ਸੋਸ਼ਲ ਮੀਡੀਆ ’ਤੇ ਬਾਲੀਵੁੱਡ ਅਦਾਕਾਰਾਂ ਕੰਗਨਾ ਰਣੌਤ ਤੇ ਤਾਪਸੀ ਪੰਨੂੰ ਵਿਚਾਲੇ ਅਕਸਰ ਤਕਰਾਰਬਾਜ਼ੀ ਦੇਖੀ ਜਾਂਦੀ ਹੈ। ਦੋਵੇਂ ਇਕ-ਦੂਜੇ ’ਤੇ ਅਕਸਰ ਟਿੱਪਣੀਆਂ ਕਰਦੀਆਂ ਰਹਿੰਦੀਆਂ ਹਨ ਪਰ ਇਸ ਵਾਰ ਤਾਪਸੀ ਨੇ ਕੰਗਨਾ ਲਈ ਕੁਝ ਅਜਿਹਾ ਕਿਹਾ ਹੈ, ਜਿਸ ਦਾ ਉਸ ਨੂੰ ਜਵਾਬ ਦੇਣਾ ਪੈ ਗਿਆ।
ਅਸਲ ’ਚ ਤਾਪਸੀ ਨੂੰ ਹਾਲ ਹੀ ’ਚ ਫ਼ਿਲਮ ‘ਥੱਪੜ’ ਲਈ ਬੈਸਟ ਐਕਟ੍ਰੈੱਸ ਦਾ ਫ਼ਿਲਮਫੇਅਰ ਐਵਾਰਡ ਮਿਲਿਆ ਹੈ। ਐਵਾਰਡ ਹਾਸਲ ਕਰਨ ਤੋਂ ਬਾਅਦ ਤਾਪਸੀ ਨੇ ਸਟੇਜ ’ਤੇ ਭਾਸ਼ਣ ਦਿੱਤਾ ਤੇ ਕੁਝ ਲੋਕਾਂ ਦਾ ਧੰਨਵਾਦ ਵੀ ਕੀਤਾ। ਤਾਪਸੀ ਨੇ ਇਸ ਦੌਰਾਨ ਦੀਪਿਕਾ, ਜਾਨ੍ਹਵੀ, ਵਿਦਿਆ ਦੇ ਨਾਲ ਕੰਗਨਾ ਦਾ ਵੀ ਨਾਂ ਲਿਆ ਤੇ ਉਸ ਦਾ ਧੰਨਵਾਦ ਕੀਤਾ।
ਇਹ ਅਦਾਕਾਰਾਂ ਵੀ ਇਸ ਐਵਾਰਡ ਲਈ ਨਾਮੀਨੇਟ ਸਨ। ਜਦੋਂ ਤਾਪਸੀ ਦੀ ਸਪੀਚ ਦੀ ਵੀਡੀਓ ਵਾਇਰਲ ਹੋਈ ਤਾਂ ਕੰਗਨਾ ਨੇ ਤੁਰੰਤ ਇਸ ’ਤੇ ਜਵਾਬ ਦੇ ਦਿੱਤਾ। ਕੰਗਨਾ ਨੇ ਵੀਡੀਓ ਨੂੰ ਰੀ-ਟਵੀਟ ਕਰਦਿਆਂ ਲਿਖਿਆ, ‘ਧੰਨਵਾਦ ਤਾਪਸੀ, ਤੁਸੀਂ ਵਿਮਲ ਇਲਾਇਚੀ ਫ਼ਿਲਮਫੇਅਰ ਐਵਾਰਡ ਦੇ ਹੱਕਦਾਰ ਹੋ। ਤੁਹਾਡੇ ਤੋਂ ਵੱਧ ਇਸ ਦਾ ਕੋਈ ਹੱਕਦਾਰ ਨਹੀਂ ਹੈ।’ ਕੰਗਨਾ ਦਾ ਇਹ ਟਵੀਟ ਕਾਫੀ ਵਾਇਰਲ ਹੋ ਰਿਹਾ ਹੈ
ਦੱਸਣਯੋਗ ਹੈ ਕਿ ਕੰਗਨਾ ਰਣੌਤ ਦੀ ਫ਼ਿਲਮ ‘ਥਲਾਇਵੀ’ ਨੂੰ ਅਣਮਿੱਥੇ ਸਮੇਂ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਇਸ ਸਬੰਧੀ ਜਾਰੀ ਕੀਤੇ ਬਿਆਨ ’ਚ ਕਿਹਾ ਗਿਆ ਹੈ ਕਿ ਫ਼ਿਲਮ ‘ਥਲਾਇਵੀ’ ਇਕ ਬਹੁ-ਭਾਸ਼ਾਈ ਫ਼ਿਲਮ ਹੈ ਤੇ 23 ਅਪ੍ਰੈਲ ਨੂੰ ਸਾਰੀਆਂ ਭਾਸ਼ਾਵਾਂ ’ਚ ਰਿਲੀਜ਼ ਲਈ ਵੀ ਤਿਆਰ ਹੈ ਪਰ ਮੌਜੂਦਾ ਸਥਿਤੀ ਦੇ ਮੱਦੇਨਜ਼ਰ ਇਸ ਨੂੰ ਇਕੋ ਸਮੇਂ ਸਾਰੀਆਂ ਭਾਸ਼ਾਵਾਂ ’ਚ ਜਾਰੀ ਕਰਨਾ ਸੰਭਵ ਨਹੀਂ ਹੈ।
