16 ਅਪ੍ਰੈਲ ਨੂੰ ਹਨੂੰਮਾਨ ਜਯੰਤੀ ਦੇ ਮੌਕੇ ‘ਤੇ ਕੱਢੇ ਜਾ ਰਹੇ ਜਲੂਸ ਦੌਰਾਨ ਪਥਰਾਅ ਅਤੇ ਅੱਗ ਲਗਾਉਣ ਦੀਆਂ ਘਟਣਾਵਾਂ ਦੇਖਣ ਨੂੰ ਮਿਲੀਆਂ ਸਨ। ਇਸ ਹਿੰਸਾ ‘ਚ 8 ਪੁਲਸ ਕਰਮਚਾਰੀਆਂ ਸਮੇਤ ਕਰੀਬ 9 ਲੋਕ ਜ਼ਖਮੀ ਵੀ ਹੋਏ। ਹਿੰਸਾ ਲਈ ਹੁਣ ਤੱਕ ਅਸਮਲ ਨਾਂ ਦੇ ਵਿਅਕਤੀ ਸਮੇਤ 14 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਜਾਣਕਾਰੀ ਮੁਤਾਬਕ ਜਦੋਂ ਸ਼ੋਭਾ ਯਾਤਰਾ ਜਹਾਂਗੀਰਪੁਰ ਦੇ ‘ਸੀ ਬਲਾਕ’ ਸਥਿਤ ਜਾਮਾ ਮਸਜਿਦ ਨੇੜੇ ਪਹੁੰਚੀ ਤਾਂ ਅੰਸਾਰ ਨਾਂ ਦਾ ਵਿਅਕਤੀ ਆਪਣੇ ਚਾਰ-ਪੰਜ ਸਾਥੀਆਂ ਸਮੇਤ ਪਹੁੰਚਿਆ ਅਤੇ ਜਲੂਸ ਵਿੱਚ ਸ਼ਾਮਲ ਲੋਕਾਂ ਨਾਲ ਬਹਿਸ ਕਰਨ ਲੱਗਾ। ਇਸ ਤੋਂ ਬਾਅਦ ਹੀ ਵਿਵਾਦ ਵਧ ਗਿਆ ਅਤੇ ਪੱਥਰਬਾਜ਼ੀ ਸ਼ੁਰੂ ਹੋ ਗਈ।
ਅੰਸਾਰ ਦੀ ਪਤਨੀ ਸਕੀਨਾ ਦਾ ਕਹਿਣਾ ਹੈ ਕਿ ਉਸ ਦਾ ਪਤੀ ਅੰਸਾਰ ਦੋਸ਼ੀ ਨਹੀਂ ਹੈ ਤੇ ਜੇਕਰ ਮੇਰਾ ਪਤੀ ਦੋਸ਼ੀ ਹੁੰਦਾ ਤਾਂ ਉਹ ਦਿੱਲੀ ਛੱਡ ਕੇ ਭੱਜ ਜਾਂਦਾ। ਉਨ੍ਹਾਂ ਕਿਹਾ ਕਿ ਅਸੀਂ 12 ਸਾਲਾਂ ਤੋਂ ਦਿੱਲੀ ਵਿਚ ਰਹਿ ਰਹੇ ਹਾਂ, ਅਸੀਂ ਕਲਕੱਤੇ ਤੋਂ ਆਏ ਹਾਂ ਅਤੇ ਸਾਲਾਂ ਤੋਂ ਸਾਰੇ ਆਂਢ-ਗੁਆਂਢ ਵਿਚ ਹਿੰਦੂ ਰਹਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਇੱਥੇ ਅਸੀਂ ਸਾਰੇ ਭਰਾਵਾਂ ਵਾਂਗ ਹਾਂ।
ਸਕੀਨਾ ਨੇ ਦੱਸਿਆ ਕਿ ਅੰਸਾਰ ਮੋਬਾਈਲ ਫ਼ੋਨ ਦਾ ਕੰਮ ਕਰਦਾ ਹੈ ਤੇ ਹਿੰਸਾ ਦੌਰਾਨ ਉਹ ਘਰ ਵਿੱਚ ਹੀ ਸੀ, ਜਦੋਂ ਹਾਲਾਤ ਵਿਗੜ ਗਏ ਤਾਂ ਉਸ ਨੂੰ ਇਕ ਫ਼ੋਨ ਆਇਆ ਤੇ ਉਹ ਕਿਸੇ ਨੂੰ ਬਚਾਉਣ ਲਈ ਕਾਹਲੀ ਵਿੱਚ ਘਰੋਂ ਨਿਕਲ ਗਿਆ। ਸਕੀਨਾ ਨੇ ਦੱਸਿਆ ਕਿ ਹਿੰਸਾ ਭੜਕਣ ਤੋਂ ਬਾਅਦ ਪੁਲਿਸ ਉਸ ਨੂੰ ਉਸੇ ਦਿਨ ਦੇਰ ਰਾਤ ਘਰੋਂ ਚੁੱਕ ਕੇ ਲੈ ਗਈ।
ਦੂਜੇ ਪਾਸੇ ਅੰਸਾਰ ਦੇ ਹਿੰਦੂ ਗੁਆਂਢੀਆਂ ਦਾ ਕਹਿਣਾ ਹੈ ਕਿ ਉਹ ਇੱਕ ਚੰਗਾ ਅਤੇ ਸਮਾਜਕ ਇਨਸਾਨ ਹੈ। ਉਨ੍ਹਾਂ ਕਿਹਾ ਕਿ ਉਹ ਝਗੜਾ ਕਰਨ ਵਾਲਾ ਨਹੀਂ ਸਗੋਂ ਉਸਨੂੰ ਨਿਪਟਾਉਣ ਵਾਲਾ ਵਿਅਕਤੀ ਹੈ।
