ਪੰਜਾਬ ਦੇ ਸਤਲੁਜ ਦਰਿਆ ਵਿੱਚ ਪਾਣੀ ਦਾ ਪੱਧਰ ਘਟਣਾ ਸ਼ੁਰੂ ਹੋ ਗਿਆ ਹੈ। ਇਸ ਕਾਰਨ ਰੂਪਨਗਰ (ਰੋਪੜ) ਵਿੱਚ ਹੜ੍ਹਾਂ ਦਾ ਪ੍ਰਭਾਵ ਵੀ ਲਗਭਗ ਖ਼ਤਮ ਹੋ ਗਿਆ ਹੈ ਪਰ ਅਜੇ ਵੀ ਇੱਥੇ ਇੱਕ ਪਿੰਡ ਅਜਿਹਾ ਹੈ, ਜਿੱਥੇ ਲੋਕ ਘਰ-ਬਾਰ ਛੱਡ ਕੇ ਪਿੰਡ ਤੋਂ ਅੱਧਾ ਕਿਲੋਮੀਟਰ ਦੂਰ ਖੁੱਲ੍ਹੇ ਅਸਮਾਨ ਹੇਠਾਂ ਰਹਿ ਰਹੇ ਹਨ। ਯੂਨਾਈਟਿਡ ਸਿੱਖ ਜਥੇਬੰਦੀ ਨੇ ਇੱਥੇ ਪਹੁੰਚ ਕੇ ਹੁਣ ਜ਼ਰੂਰੀ ਵਸਤਾਂ ਮੁਹੱਈਆ ਕਰਵਾਉਣੀਆਂ ਸ਼ੁਰੂ ਕਰ ਦਿੱਤੀਆਂ ਹਨ।
ਦੱਸ ਦੇਈਏ ਕਿ ਹਰਸ਼ਾ-ਬੇਲਾ ਪਿੰਡ ਵਿੱਚ ਕੁੱਲ 16 ਘਰ ਹਨ। ਹੜ੍ਹ ਕਾਰਨ ਪੂਰੇ ਪਿੰਡ ਨੂੰ ਖਾਲੀ ਕਰਵਾ ਲਿਆ ਗਿਆ ਹੈ। ਹਰ ਘਰ ‘ਤੇ ਤਾਲੇ ਲੱਗੇ ਹੋਏ ਹਨ। ਘਰਾਂ ਦੀ ਦੇਖ-ਭਾਲ ਕਰਨ ਲਈ ਕੁਝ ਹੀ ਲੋਕ ਰਹਿ ਰਹੇ ਹਨ। ਇਨ੍ਹਾਂ ਲੋਕਾਂ ਨੇ ਦੱਸਿਆ ਕਿ ਕਦੇ ਪਾਣੀ ਵੱਧ ਜਾਂਦਾ ਹੈ ਤੇ ਕਦੇ ਘਟਦਾ ਹੈ। ਜਿਸ ਕਾਰਨ ਲੋਕਾਂ ਨੂੰ ਘਰ-ਬਾਰ ਛੱਡਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ ਪਰ ਇਸ ਤੋਂ ਵੱਧ ਪ੍ਰੇਸ਼ਾਨੀ ਦੀ ਗੱਲ ਇਹ ਹੈ ਕਿ ਉਨ੍ਹਾਂ ਨੂੰ ਖੁੱਲ੍ਹੇ ਅਸਮਾਨ ਹੇਠ ਰਹਿਣਾ ਪੈ ਰਿਹਾ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਿੰਡ ਦੇ ਸਾਰੇ ਲੋਕ ਪੰਜ ਦਿਨਾਂ ਤੋਂ ਪਿੰਡ ਤੋਂ ਅੱਧਾ ਕਿਲੋਮੀਟਰ ਦੂਰ ਬੰਗਾਲਾ ਬਸਤੀ ਵਿੱਚ ਖੁੱਲ੍ਹੇ ਅਸਮਾਨ ਹੇਠ ਬੈਠੇ ਹਨ। ਪਿੰਡ ਦੇ ਰਹਿਣ ਵਾਲੇ ਲੋਕ ਆਪਣੇ ਪਸ਼ੂ ਵੀ ਨਾਲ ਲੈ ਕੇ ਆਏ ਹਨ। ਇਨ੍ਹਾਂ ਸਾਰਿਆਂ ਦੇ ਕੋਲ ਬੰਗਾਲਾ ਬਸਤੀ ਵਿੱਚ ਕਰੀਬ 150 ਪਸ਼ੂ ਹਨ। ਦੁੱਧ ਕੱਢਣ ਤੋਂ ਲੈ ਕੇ ਪਸ਼ੂਆਂ ਨੂੰ ਚਾਰਾ ਮੁਹੱਈਆ ਕਰਵਾਉਣ ਤੱਕ ਸਭ ਲੋਕ ਆਪਸ ਵਿੱਚ ਮਿਲ ਕੇ ਵੰਡ ਰਹੇ ਹਨ।
ਹੜ੍ਹ ਕਾਰਨ ਪਿੰਡ ਦਾ ਕਾਫੀ ਨੁਕਸਾਨ ਹੋਇਆ ਹੈ
ਪਿੰਡ ਵਿੱਚ ਹੜ੍ਹ ਦਾ ਪਾਣੀ ਇੰਨਾ ਆ ਗਿਆ ਕਿ ਇੱਕ ਪੂਰੀ ਕੋਠੀ ਦਰਿਆ ਵਿੱਚ ਡੁੱਬ ਗਈ। ਦੂਜੇ ਘਰ ਦਾ 70% ਹਿੱਸਾ ਵੀ ਦਰਿਆ ਵਿੱਚ ਵਹਿ ਗਿਆ। ਦਰਿਆ ਨੇ ਇੱਕ ਹੋਰ ਘਰ ਦਾ 40% ਹਿੱਸਾ ਵੀ ਵਹਾ ਦਿੱਤਾ। ਹੜ੍ਹਾਂ ਦੀ ਸੰਭਾਵਨਾ ਦੇ ਮੱਦੇਨਜ਼ਰ ਪਿੰਡ ਦੇ ਗੁਰਦੁਆਰਾ ਸਾਹਿਬ ਤੋਂ ਲੋਕ 5 ਦਿਨ ਪਹਿਲਾਂ ਹੀ ਪਵਿੱਤਰ ਸਰੂਪ ਲੈ ਕੇ ਨੇੜਲੇ ਪਿੰਡ ਦੇ ਗੁਰਦੁਆਰਾ ਸਾਹਿਬ ਵਿਖੇ ਨਤਮਸਤਕ ਹੋਏ ਸਨ।
ਟਰਾਲੀਆਂ ‘ਤੇ ਲੱਦਿਆ ਸਾਮਾਨ, ਲੋਕ ਘਰਾਂ ਤੋਂ ਬਾਹਰ ਨਹੀਂ ਨਿਕਲ ਸਕੇ
ਪਿੰਡ ਹਰਸ਼ਾ-ਬੇਲਾ ਵਿੱਚ ਜ਼ਰੂਰੀ ਘਰੇਲੂ ਸਾਮਾਨ ਖੁੱਲ੍ਹੇ ਅਸਮਾਨ ਹੇਠ ਪਿਆ ਹੈ। ਜਿਹੜੇ ਪਰਿਵਾਰ ਥੋੜ੍ਹਾ-ਬਹੁਤ ਖੁਸ਼ਹਾਲ ਸਨ ਅਤੇ ਜਿਨ੍ਹਾਂ ਕੋਲ ਟਰੈਕਟਰ-ਟਰਾਲੀਆਂ ਸਨ, ਉਨ੍ਹਾਂ ਨੇ ਆਪਣੇ ਘਰਾਂ ਦਾ ਜ਼ਰੂਰੀ ਸਾਮਾਨ ਟਰਾਲੀਆਂ ਵਿੱਚ ਲੱਦ ਕੇ ਛੱਡ ਦਿੱਤਾ ਹੈ। ਪਿੰਡ ਨੂੰ ਜਾਣ ਵਾਲੀਆਂ ਸਾਰੀਆਂ ਸੜਕਾਂ ਟੁੱਟਣ ਕਾਰਨ ਇਹ ਲੋਕ ਆਪਣਾ ਸਾਮਾਨ ਵੀ ਸੁਰੱਖਿਅਤ ਥਾਂ ’ਤੇ ਨਹੀਂ ਲਿਜਾ ਸਕੇ।
ਘਰਾਂ ਵਿੱਚ ਬਿਸਤਰੇ, ਕੁਰਸੀਆਂ, ਵਾਸ਼ਿੰਗ ਮਸ਼ੀਨਾਂ, ਪੱਖੇ, ਫਰਿੱਜ, ਅਨਾਜ ਅਤੇ ਇੱਥੋਂ ਤੱਕ ਕਿ ਕੱਪੜੇ ਵੀ ਖੁੱਲ੍ਹੇ ਅਸਮਾਨ ਹੇਠ ਪਏ ਹਨ। ਇਸ ਪਿੰਡ ਤੱਕ ਪਹੁੰਚਣਾ ਵੀ ਬਹੁਤ ਔਖਾ ਹੈ, ਕਿਉਂਕਿ ਹੜ੍ਹ ਵਿੱਚ ਸਾਰੀਆਂ ਸੜਕਾਂ ਅਤੇ ਰਸਤੇ ਵਹਿ ਗਏ ਹਨ। ਪਿੰਡ ਤੱਕ ਪਹੁੰਚਣ ਲਈ ਸਤਲੁਜ ਦਰਿਆ ਦੇ ਪੁਲ ਤੋਂ ਹੇਠਾਂ ਉਤਰ ਕੇ ਟਰੈਕਟਰ ‘ਤੇ ਕਰੀਬ ਇਕ ਘੰਟਾ ਸਫ਼ਰ ਕਰਨਾ ਪੈਂਦਾ ਹੈ।
ਨੋਟ: ਪੰਜਾਬੀ ਦੀਆਂ ਬ੍ਰੇਕਿੰਗ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੇ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਤੁਸੀਂ Pro Punjab TV ਨੂੰ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਫੇਸਬੁੱਕ, ਟਵਿੱਟਰ ਤੇ ਇੰਸਟਾਗ੍ਰਾਮ ‘ਤੇ ਵੀ ਫੋਲੋ ਕਰ ਸਕਦੇ ਹੋ।
TV, FACEBOOK, YOUTUBE ਤੋਂ ਪਹਿਲਾਂ ਹਰ ਖ਼ਬਰ ਪੜ੍ਹਣ ਲਈ ਡਾਉਨਲੋਡ ਕਰੋ PRO PUNJAB TV APP
APP ਡਾਉਨਲੋਡ ਕਰਨ ਲਈ Link ‘ਤੇ Click ਕਰੋ:
Android: https://bit.ly/3VMis0h
