ਅਮਰੀਕੀ ਰਾਜ ਕੈਲੀਫੋਰਨੀਆ ‘ਚ ਅਗਵਾ ਕੀਤੇ ਗਏਸਿੱਖ ਪਰਿਵਾਰ ਦੇ ਪੰਜਾਬ ਰਹਿੰਦੇ ਮੈਂਬਰ ਸਦਮੇ ‘ਚ ਹਨ।ਜ਼ਿਕਰਯੋਗ ਹੈ ਕਿ ਉਥੇ ਅੱਠ ਸਾਲਾਂ ਦੀ ਇਕ ਬੱਚੀ ਸਣੇ ਪਰਿਵਾਰ ਦੇ ਚਾਰ ਮੈਂਬਰਾਂ ਨੂੰ ਅਗਵਾ ਕਰ ਲਿਆ ਗਿਆ ਸੀ।ਇਹ ਸਿੱਖ ਪਰਿਵਾਰ ਪੰਜਾਬ ਦੇ ਹੁਸ਼ਿਆਰਪੁਰ ਜ਼ਿਲ੍ਹੇ ਨਾਲ ਸਬੰਧਤ ਹੈ।ਅਮਰੀਕੀ ਪੁਲਿਸ ਨੇ ਇਸ ਮਾਮਲੇ ‘ਚ 48 ਸਾਲਾਂ ਦੇ ਇਕ ਵਿਅਕਤੀ ਨੂੰ ਸ਼ੱਕ ਦੇ ਆਧਾਰ ‘ਤੇ ਹਿਰਾਸਤ ‘ਚ ਲਿਆ ਹੈ ਜੋ ਕਿ ਗੰਭੀਰ ਜਖਮੀ ਹੈ।ਜਦਕਿ ਪਰਿਵਾਰ ਦਾ ਹਾਲੇ ਤਕ ਕੋਈ ਥਹੁਪਤਾ ਨਹੀਂ ਲੱਗਾ।
ਅਗਵਾ ਮੈਂਬਰਾ ‘ਚੋਂ ਇਕ ਦਾ ਵਾਹਨ ਸੋਮਵਾਰ ਰਾਤ ਪੁਲਿਸ ਨੂੰ ਅੱਗ ਨਾਲ ਸੜਿਆ ਹੋਇਆ ਮਿਲਿਆ ਸੀ।ਪਰਿਵਾਰ ਨੂੰ ਸੋਮਵਾਰ ਮਰਸਿਡ ਕਾਊਂਟੀ ‘ਚਂ ਅਗਵਾ ਕੀਤਾ ਗਿਆ ਸੀ।ਅੱਠ ਸਾਲਾਂ ਦੀ ਬੱਚੀ ਅਰੂਹੀ ਢੇਰੀ, ਉਸਦੀ 27 ਸਾਲਾ ਮਾਂ ਜਸਲੀਨ ਕੌਰ, 36 ਸਾਲਾ ਪਿਤਾ ਜਸਦੀਪ ਸਿੰਘ ਤੇ 39 ਸਾਲਾ ਤਾਇਆ ਅਮਨਦੀਪ ਸਿੰਘ ਲਾਪਤਾ ਹਨ।
ਇਕ ਖਬਰ ਮੁਤਾਬਕ ਪੁਲਿਸ ਨੂੰ ਮੰਗਲਵਾਰ ਸਵੇਰੇ ਸੂਚਨਾ ਮਿਲੀ ਸੀ ਕਿ ਪਰਿਵਾਰ ਦੇ ਮੈਂਬਰਾਂ ‘ਚੋਂ ਇਕ ਦਾ ਬੈਂਕ ਕਾਰਡ ਮਰਸਿਡ ਕਾਊਂਟੀ ਦੇ ਐਟਵਾਟਰ ‘ਚ ਵਰਤਿਆਗਿਆ ਹੈ।ਇਸ ਤੋਂ ਬਾਅਦ ਜਾਂਚ ਕਰਤਾਵਾਂ ਨੇ ਇਕ ਵਿਅਕਤੀ ਦੀ ਫੋਟੋ ਹਾਸਲ ਕੀਤੀ ਜੋ ਬੈਂਕ ‘ਚੋਂ ਪੈਸੇ ਕਢਵਾ ਰਿਹਾ ਸੀ।ਉਸਦਾ ਹੁਲੀਆ ਅਗਵਾ ਵਾਲੇ ਘਟਨਾ ਸਥਾਨ ਦੀ ਫੋਟੋ ਵਿਚਲੇ ਵਿਅਕਤੀ ਨਾਲ ਮੇਲ ਖਾਂਦਾ ਸੀ।
