ਆਂਧਰਾ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਐਨ ਚੰਦਰਬਾਬੂ ਨਾਇਡੂ ਤੇ ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ, ਦੋਹਾਂ ਦੇ ਰਿਸ਼ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਉਤਰਾਅ-ਚੜ੍ਹਾਅ ਭਰੇ ਰਹੇ ਹਨ।ਦੋਵੇਂ ਹੀ ਐਨ.ਡੀ.ਏ. ਦਾ ਸਾਥ ਛੱਡ ਚੁੱਕੇ ਸਨ ਅਤੇ ਲੋਕ ਸਭਾ ਚੋਣਾਂ ਤੋਂ ਬਿਲਕੁਲ ਪਹਿਲਾਂ ਹੀ ਵਾਪਸ ਗਠਜੋੜ ‘ਚ ਸ਼ਾਮਿਲ ਹੋ ਗਏ ਹਨ।ਅਜਿਹੇ ‘ਚ ਆਓ ਜਾਣਦੇ ਹਾਂ ਕਿ ਨਿਤੀਸ਼ ਕੁਮਾਰ ਤੇ ਚੰਦਰਬਾਬੂ ਨਾਇਡੂ ਦੇ ਪੀ.ਐਮ ਮੋਦੀ ਨਾਲ ਕਿਹੋ ਜਿਹੇ ਰਿਸ਼ਤੇ ਰਹੇ।
ਮੋਦੀ-ਨਿਤੀਸ਼ ਦੀ ਜੋੜੀ: ਮੋਦੀ ਅਤੇ ਨਿਤੀਸ਼ ਵਿਚਾਲੇ ਰਿਸ਼ਤੇ ਬਹੁਤ ਪਹਿਲਾਂ ਤੋਂ ਹੀ ਉਤਰਾਅ ਚੜ੍ਹਆ ਭਰੇ ਰਹੇ ਸਨ।ਨਿਤੀਸ਼ ਨੂੰ ਡਰ ਬਣਿਆ ਰਹਿੰਦਾ ਸੀ ਕਿ ਮੋਦੀ ਦਾ ਸਾਥ ਉਨ੍ਹਾਂ ਦੇ ਵੋਟਰਾਂ ਨੂੰ ਨਾਰਾਜ਼ ਨਾ ਕਰ ਦੇਵੇ।ਇਸ ਲਈ 2009 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਵੀ ਨਿਤੀਸ਼ ਨੇ ਮੋਦੀ ਨੂੰ ਬਿਹਾਰ ‘ਚ ਪ੍ਰਚਾਰ ਕਰਨ ਨਹੀਂ ਦਿੱਤਾ ਸੀ।
ਜਦੋਂ ਨਿਤੀਸ਼ ਨੇ ਮੋੜ ਦਿੱਤਾ ਸੀ ਗੁਜਰਾਤ ਸਰਕਾਰ ਦਾ 5 ਕਰੋੜ: ਜੂਨ 2010 ‘ਚ ਪਟਨਾ ‘ਚ ਭਾਜਪਾ ਦੀ ਰਾਸ਼ਟਰੀ ਕਾਰਜਕਾਰਨੀ ਦੀ ਮੀਟਿੰਗ ਹੋਣੀ ਸੀ।ਇਸ ਤੋਂ ਪਹਿਲਾਂ ਪਟਨਾ ਦੀਆਂ ਅਖਬਾਰਾਂ ‘ਚ ਇਸ਼ਤਿਹਾਰ ਛਪੇ, ਜਿਸ ‘ਚ ਨਰਿੰਦਰ ਮੋਦੀ ਨੂੰ ਨਿਤੀਸ਼ ਕੁਮਾਰ ਦੇ ਨਾਲ ਹੱਥ ਮਿਲਾਉਂਦੇ ਹੋਏ ਦਿਖਾਇਆ ਗਿਆ ਸੀ।ਇਸ ਨਾਲ ਨਿਤੀਸ਼ ਇੰਨੇ ਨਾਰਾਜ਼ ਹੋਏ ਕਿ ਉਨ੍ਹਾਂ ਨੇ ਭਾਜਪਾ ਨੇਤਾਵਾਂ ਲਈ ਡਿਨਰ ਦਾ ਪ੍ਰੋਗਰਾਮ ਕੈਂਸਲ ਕਰ ਦਿੱਤਾ ਸੀ।ਇੰਨਾ ਹੀ ਨਹੀਂ, ਇਸ ਤੋਂ ਬਾਅਦ ਨਿਤੀਸ਼ ਨੇ ਕੋਸੀ ਹੜ੍ਹ ਰਾਹਤ ਲਈ ਗੁਜਰਾਤ ਸਰਕਾਰ ਤੋਂ ਮਿਲਿਆ 5 ਕਰੋੜ ਰੁ. ਦਾ ਚੈਕ ਵੀ ਮੋੜ ਦਿੱਤਾ ਸੀ।
ਇਸੇ ਸਾਲ ਫਿਰ ਫੜਿਆ ਐਨ.ਡੀ.ਏ ਦਾ ਹੱਥ: 2015 ਦੀਆਂ ਵਿਧਾਨ ਸਭਾ ਚੋਣਾਂ ਉਨ੍ਹਾਂ ਨੇ ਲਾਲੂ ਯਾਦਵ ਦੀ ਆਰ.ਜੇ.ਡੀ. ਨਾਲ ਮਿਲਕੇ ਲੜੀਆਂ ਸਨ।ਪਰ ਦੋ ਸਾਲ ਬਾਅਦ ਹੀ ਜੁਲਾਈ 2017 ‘ਚ ਨਿਤੀਸ਼ ਪਲਟੀ ਮਾਰਦੇ ਹੋਏ ਦੁਬਾਰਾ ਐਨਡੀਏ ‘ਚ ਆ ਗਏ।ਐਨਡੀਏ ‘ਚ ਆਉਣ ਤੋਂ ਬਾਅਦ 2019 ਦੀਆਂ ਲੋਕ ਸਭਾ ਅਤੇ 2020 ਦੀਆਂ ਵਿਧਾਨ ਸਭਾ ਚੋਣਾਂ ਉਨ੍ਹਾਂ ਨੇ ਭਾਜਪਾ ਨਾਲ ਮਿਲ ਕੇ ਲੜੀਆਂ।ਪਰ ਫਿਰ ਅਗਸਤ 2022 ‘ਚ ਉਨ੍ਹਾਂ ਨੇ ਪਲਟੀ ਮਾਰੀ ਅਤੇ ਆਰਜੇਡੀ ਨਾਲ ਮਿਲ ਕੇ ਸਰਕਾਰ ਬਣਾਈ।ਇਸੇ ਸਾਲ ਜਨਵਰੀ ‘ਚ ਨਿਤੀਸ਼ ਕੁਮਾਰ ਨੇ ਯੂਟਰਨ ਲੈਂਦੇ ਹੋਏ ਆਰ.ਜੇ.ਡੀ ਦਾ ਸਾਥ ਛੱਡਿਆ ਅਤੇ ਫਿਰ ਐਨ.ਡੀ.ਏ ‘ਚ ਆ ਗਏ।
ਮੋਦੀ-ਨਾਇਡੂ ਦੀ ਦੋਸਤੀ: ਨਿਤੀਸ਼ ਵਾਂਗ ਮੋਦੀ ਅਤੇ ਚੰਦਰਬਾਬੂ ਨਾਇਡੂ ਦੀ ਦੋਸਤੀ ਵੀ ਉਤਰਾਅ-ਚੜ੍ਹਾਅ ਨਾਲ ਭਰੀ ਰਹੀ ਹੈ।2018 ਤੱਕ ਨਾਇਡੂ ਦੀ ਟੀ.ਡੀ.ਪੀ.ਐਨ.ਡੀ.ਏ ਦਾ ਹਿੱਸਾ ਸੀ।ਐਨਡੀਏ ਤੋਂ ਵੱਖ ਹੋਣ ਤੋਂ ਬਾਅਦ ਨiਾੲਡੂ ਦੀ ਟੀ.ਡੀ.ਪੀ ਨੇ ਮਾਰਚ 2018 ‘ਚ ਮੋਦੀ ਸਰਕਾਰ ਵਿਰੁੱਧ ਸੰਸਦ ‘ਚ ਅਵਿਸ਼ਵਾਸ਼ ਮਤਾ ਪੇਸ਼ ਕੀਤਾ ਸੀ।ਹਾਲਾਂਕਿ, ਇਹ ਮਤਾ ਡਿੱਗ ਗਿਆ ਸੀ।2019 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਮੋਦੀ ਅਤੇ ਨਾਇਡੂ ਵਿਚਾਲੇ ਕਈ ਵਾਰ ਤਿੱਖੀ ਬਿਆਨਬਾਜ਼ੀ ਵੀ ਹੋਈ ਸੀ।ਗਠਜੋੜ ਤੋਂ ਵੱਖ ਹੋਣ ਕਾਰਨ ਪੀ.ਐਮ ਮੋਦੀ ਨੇ ਨਾਇਡੂ ਨੂੰ ‘ਯੂਟਰਨ ਬਾਬੂ’ ਕਿਹਾ ਸੀ।
ਗੁਜਰਾਤ ਦੰਗਿਆਂ ਤੋਂ ਬਾਅਦ ਮੋਦੀ ਦਾ ਅਸਤੀਫਾ ਸਭ ਤੋਂ ਪਹਿਲਾਂ ਨਾਇਡੂ ਨੇ ਮੰਗਿਆ ਸੀ: 2002 ਦੇ ਗੁਜਰਾਤ ਦੰਗਿਆਂ ਤੋਂ ਬਾਅਦ ਨਾਇਡੂ ਉਨ੍ਹਾਂ ਨੇਤਾਵਾਂ ਵਿਚੋਂ ਇਕ ਸਨ, ਜਿਨ੍ਹਾਂ ਨੇ ਸਭ ਤੋਂ ਪਹਿਲਾਂ ਨਰਿੰਦਰ ਮੋਦੀ ਤੋਂ ਅਸਤੀਫਾ ਮੰਗਿਆ ਸੀ।2002 ਦੇ ਗੁਜਰਾਤ ਦੰਗਿਆਂ ਦਾ ਜ਼ਿਕਰ ਕਰਦੇ ਹੋਏ 2019 ‘ਚ ਇਕ ਚੋਣ ਰੈਲੀ ‘ਚ ਨਾਇਡੂ ਨੇ ਕਿਹਾ ਸੀ ਕਿ ਮੈਂ ਪਹਿਲਾ ਵਿਅਕਤੀ ਸੀ ਜਿਸਨੇ ਉਨ੍ਹਾਂ ਦਾ ਅਸਤੀਫਾ ਮੰਗਿਆ ਸੀ।
ਪਵਨ ਕਲਿਆਣ ਲੈ ਆਏ ਦੋਹਾਂ ਨੂੰ ਨੇੜੇ: ਹਾਲਾਂਕਿ, 2019 ਦੀਆਂ ਲੋਕ ਸਭਾ ਅਤੇ ਆਂਧਰਾ ਪ੍ਰਦੇਸ਼ ਦੀਆਂ ਵਿਧਾਨ ਸਭਾ ਚੋਣਾਂ ‘ਚ ਹਾਰ ਤੋਂ ਬਾਅਦ ਨਾਇਡੂ ਨੇ ਕਈ ਵਾਰ ਕਥਿਤ ਤੌਰ ‘ਤੇ ਐਨ.ਡੀ.ਏ ‘ਚ ਸ਼ਾਮਿਲ ਹੋਣ ਦੀ ਕੋਸ਼ਿਸ਼ ਕੀਤੀ।ਮੰਨਿਆ ਜਾਂਦਾ ਹੈ ਕਿ ਨਾਇਡੂ ਨੇ ਜੋ ਕੁਝ ਵੀ ਬਿਆਨਬਾਜ਼ੀ ਕੀਤੀ ਸੀ, ਉਸਨੂੰ ਲੈ ਕੇ ਮੋਦੀ ਟੀ.ਡੀ.ਪੀ. ਨੂੰ ਐਨ ਡੀ ਏ ‘ਚ ਲਿਆਉਣਾ ਨਹੀਂ ਚਾਹੁੰਦੇ ਸਨ ਪਰ ਐਕਟਰ ਤੋਂ ਰਾਜਨੇਤਾ ਬਣੇ ਪਵਨ ਕਲਿਆਣ ਮੋਦੀ ਅਤੇ ਨਾਇਡੂ ਨੂੰ ਨੇੜੇ ਲੈ ਕੇ ਆਏ।ਆਖਿਰ ਚੋਣਾਂ ਤੋਂ ਬਿਲਕੁਲ ਪਹਿਲਾਂ ਮਾਰਚ ‘ਚ ਟੀ.ਡੀ.ਪੀ.ਐਨ.ਡੀ.ਏ ‘ਚ ਸ਼ਾਮਿਲ ਹੋ ਗਏ।
