surrey:ਸਰੀ ਦੀ ਭਵਕਿਰਨ ਢੇਸੀ (ਕਿਰਨ ਢੇਸੀ) ਦੇ ਕਤਲ ਦੇ ਮਾਮਲੇ ਵਿੱਚ ਆਪਣਾ ਗੁਨਾਹ ਕਬੂਲ ਚੁੱਕੇ ਹਰਜੋਤ ਸਿੰਘ ਦਿਉ ਨੂੰ 7 ਸਾਲ ਦੀ ਜੇਲ੍ਹ ਦੀ ਸਜਾ ਸੁਣਾਈ ਗਈ ਹੈ। ਬੀ.ਸੀ. ਸੁਪਰੀਮ ਕੋਰਟ ਵਿੱਚ ਹਰਜੋਤ ਸਿੰਘ ਦਿਓ ਨੂੰ ਮੰਗਲਵਾਰ ਨੂੰ ਸਜਾ ਸੁਣਾਈ ਗਈ। ਬੀ.ਸੀ. ਪ੍ਰੌਸੀਕਿਊਸ਼ਨ ਸਰਵਿਸਸ ਨੇ ਪੁਸ਼ਟੀ ਕੀਤੀ ਕਿ ਹਰਜੋਤ ਦਿਉ ਨੂੰ ਮੈਨਸਲੌਟਰ ਦੇ ਦੋਸ਼ਾਂ ਤਹਿਤ 5 ਸਾਲ ਦੀ ਕੈਦ ਅਤੇ ਇਨਸਾਨੀ ਅੰਗਾਂ ਦਾ ਨਿਰਾਦਰ ਕਰਨ ਦੇ ਦੋਸ਼ਾਂ ਲਈ 2 ਸਾਲ ਦੀ ਸਜਾ ਸੁਣਾਈ ਗਈ ਹੈ।
ਇਹ ਦੋਵੇਂ ਸਜਾਵਾਂ ਅਲੱਗ-ਅਲੱਗ ਕੱਟਣ ਕਾਰਨ ਦੋਸ਼ੀ ਦੀ ਕੁੱਲ ਸਜਾ 7 ਸਾਲ ਬਣਦੀ ਹੈ। ਇਸ ਤੋਂ ਇਲਾਵਾ ਜਮਾਨਤ ‘ਤੇ ਰਿਹਾਅ ਹੋਣ ਤੋਂ ਪਹਿਲਾਂ ਜਿਹੜਾ ਸਮਾਂ ਉਸਨੇ ਜੇਲ੍ਹ ਵਿੱਚ ਬਿਤਾਇਆ ਉਸ ਦਾ ਕ੍ਰੈਡਿਟ ਵੀ ਉਸਨੂੰ ਦਿੱਤਾ ਜਾਵੇਗਾ। ਯਾਦ ਰਹੇ ਕਿਰਨ ਢੇਸੀ ਦੀ ਉਮਰ 19 ਸਾਲ ਸੀ।
ਕਿਰਨ ਢੇਸੀ ਦਾ ਮ੍ਰਿਤ ਸ਼ਰੀਰ ਇੱਕ ਅੱਗ ਦੇ ਹਵਾਲੇ ਹੋਈ ਗੱਡੀ ‘ਚ 2 ਅਗਸਤ 2017 ਨੂੰ 24 ਐਵੀਨਿਊ ਅਤੇ 188 ਸਟਰੀਟ ਕੋਲ ਮਿਲਿਆ ਸੀ। ਕਿਰਨ ਢੇਸੀ ਕੇ.ਪੀ.ਯੂ. ‘ਚ ਵਿਦਿਆਰਥਣ ਸੀ। ਹਰਜੋਤ ਸਿੰਘ ਦਿਓ ਨੂੰ ਕਿਰਨ ਢੇਸੀ ਦਾ ਐਕਸ-ਬੁਆਏਫਰੈਂਡ ਦੱਸਿਆ ਜਾਂਦਾ ਹੈ। ਦੋਸ਼ ਕਬੂਲਣ ਮੌਕੇ ਹਰਜੋਤ ਸਿੰਘ ਦਿਓ ਦੇ ਵਕੀਲ ਦਾ ਕਹਿਣਾ ਸੀ ਕਿ ਦਿਓ ਕੋਲ ਬੰਦੂਕ ਸੀ ਜੋ ਗਲਤੀ ਤੋਂ ਚੱਲ ਗਈ ਸੀ। ਵਕੀਲ ਨੇ ਕਿਹਾ ਸੀ ਕਿ ਇਸ ਤੋਂ ਬਾਅਦ ਦਿਓ ਨੇ ਕੁਝ ਅਜਿਹੇ ਕਦਮ ਚੁੱਕੇ ਜਿਸ ਨਾਲ ਪੀੜਤ ਦੀ ਪਛਾਣ ਨਾ ਹੋ ਸਕੇ।
