ਸਮਰਾਲਾ ਇਲਾਕੇ ‘ਚ ਆਏ ਦਿਨ ਹੋ ਰਹੀਆਂ ਲੁੱਟਾਂ-ਖੋਹਾਂ ਦਾ ਰੁਝਾਨ ਰੁਕਦਾ ਨਜ਼ਰ ਨਹੀਂ ਆ ਰਿਹਾ।ਛੋਟੀਆਂ-ਛੋਟੀਆਂ ਲੁੱਟਾਂ ਅਤੇ ਚੋਰੀਆਂ ਦੀ ਗਿਣਤੀ ਬੇਸ਼ੁਮਾਰ ਹੈ, ਜੋ ਪੁਲਿਸ ਦੇ ਰਿਕਾਰਡ ‘ਚ ਵੀ ਨਹੀਂ ਆਉਂਦੀਆਂ।ਇੱਥੋਂ ਦੇ ਡੱਬੀ ਬਾਜ਼ਾਰ ਨੇੜੇ ਢਿੱਲੋਂ ਮੁਹੱਲੇ ‘ਚ ਉਸ ਸਮੇਂ ਘੋਰ ਕਲਯੁਗ ਬੀਤਦਾ ਨਜ਼ਰ ਆਇਆ ਜਦੋਂ ਇਕ ਬੇਸਹਾਰਾ ਬਜ਼ੁਰਗ ਔਰਤ ਤੋਂ ਪਾਣੀ ਪੀਣ ਦੇ ਬਹਾਨੇ ਆਇਆ ਲੁਟੇਰਾ ਉਸਦੀਆਂ ਸੋਨੇ ਦੀਆਂ ਵਾਲੀਆਂ ਝੱਪਟ ਕੇ ਫਰਾਰ ਹੋ ਗਿਆ।
ਜਾਣਕਾਰੀ ਮੁਤਾਬਕ ਸੁਰਿੰਦਰਾ ਬਜ਼ੁਰਗ ਜੋ ਕਿ 82 ਸਾਲਾਂ ਦੀ ਹੈ ਪਤਨੀ ਨਸੀਬ ਚੰਦ ਜੋ ਕਿ ਘਰ ‘ਚ ਬੇਸਹਾਰਾ ਇਕੱਲੀ ਰਹਿ ਰਹੀ ਹੈ।ਕਿਉਂਕਿ ਤਿੰਨ ਪੁੱਤਰਾਂ ਦੀ ਜਵਾਨੀ ਪਹਿਰੇ ਹੀ ਦਿਹਾਂਤ ਹੋ ਚੁੱਕਾ ਹੈ।ਇਹ ਔਰਤ ਬੀਤੀ ਰਾਤ ਸਾਢੇ ਅੱਠ ਵਜੇ ਜਦੋਂ ਆਪਣੇ ਘਰ ‘ਚ ਰੋਟੀ ਕਾ ਰਹੀ ਸੀ ਤਾਂ ਇਕ ਨੌਜਵਾਨ ਆਇਆ ਤੇ ਉਸਨੇ ਆ ਕੇ ਕਿਹਾ ਕਿ ਮੈਨੂੰ ਪੀਣ ਲਈ ਪਾਣੀ ਦਿਓ।
ਇਨ੍ਹਾਂ ਕਹਿ ਕੇ ਉਸਨੇ ਝਪਟ ਮਾਰ ਕੇ ਕੰਨਾਂ ‘ਚ ਦੋਵੇਂ ਵਾਲੀਆਂ ਕੱਢ ਲਈਆਂ।ਇਹ ਲੁਟੇਰਾ ਪੈਦਲ ਘਰ ‘ਚ ਦਾਖਲ ਹੋਇਆ ਸੀ ਅਤੇ ਵਾਰਦਾਤ ਨੂੰ ਅੰਜ਼ਾਮ ਦੇ ਕੇ ਫਰਾਰ ਹੋ ਗਿਆ।ਇਸ ਸਬੰਧੀ ਪੀੜਤ ਔਰਤ ਵਲੋਂ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ।ਪੁਲਿਸ ਨੇ ਪੀੜਤ ਸੁਰਿੰਦਰਾ ਦੇ ਬਿਆਨਾਂ ਦੇ ਆਧਾਰ ‘ਤੇ ਮਾਮਲਾ ਦਰਜ ਕਰਕੇ ਲੁਟੇਰੇ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।
