ਇਨਕਮ ਟੈਕਸ ਅਤੇ ਈਡੀ ਜਲਦੀ ਹੀ 1 ਕਰੋੜ ਰੁਪਏ ਦੇ ਰਿਸ਼ਵਤ ਮਾਮਲੇ ਵਿੱਚ ਫੜੇ ਗਏ ਏਆਈਜੀ ਆਸ਼ੀਸ਼ ਕਪੂਰ ਦੀ ਜਾਂਚ ਵਿੱਚ ਸ਼ਾਮਲ ਹੋਣਗੇ। ਵਿਜੀਲੈਂਸ ਜਾਂਚ ਲਈ ਦੋਵਾਂ ਵਿਭਾਗਾਂ ਨੂੰ ਚਿੱਠੀ ਲਿਖੀ ਹੈ। ਵਿਜੀਲੈਂਸ ਮੁਤਾਬਕ ਇਹ ਮਾਮਲਾ ਹੁਣ 1 ਕਰੋੜ ਦੀ ਰਿਸ਼ਵਤ ਦਾ ਨਹੀਂ ਸਗੋਂ ਕਰੋੜਾਂ ਰੁਪਏ ਦੀ ਜਾਇਦਾਦ ਦਾ ਬਣ ਗਿਆ ਹੈ। ਵਿਜੀਲੈਂਸ ਨੂੰ ਕਪੂਰ ਦੀਆਂ ਚੰਡੀਗੜ੍ਹ, ਜ਼ੀਰਕਪੁਰ, ਪਟਿਆਲਾ, ਲਹਿਰਾਗਾਗਾ ਸਮੇਤ ਕਈ ਥਾਵਾਂ ‘ਤੇ 8 ਜਾਇਦਾਦਾਂ ਦਾ ਰਿਕਾਰਡ ਮਿਲਿਆ ਹੈ।
ਇਨ੍ਹਾਂ ਦੀ ਕੀਮਤ 15 ਕਰੋੜ ਦੱਸੀ ਗਈ ਹੈ। ਵਿਜੀਲੈਂਸ ਨੇ ਕਪੂਰ ਦੇ ਚੰਡੀਗੜ੍ਹ ਸਥਿਤ ਨਿੱਜੀ ਬੈਂਕ ਦਾ ਲਾਕਰ ਵੀ ਖੋਲ੍ਹਿਆ, ਜਿਸ ‘ਚੋਂ 1.25 ਕਿਲੋ ਸੋਨਾ ਅਤੇ ਹੀਰੇ ਦੇ ਗਹਿਣੇ ਜ਼ਬਤ ਕੀਤੇ ਗਏ ਹਨ। ਆਸ਼ੀਸ਼ ਕਪੂਰ ਦੀ ਮਹਿਲਾ ਦੋਸਤ ਨੇ ਬਿਆਨਾਂ ਵਿਚ ਦੱਸਿਆ ਸੀ ਕਿ ਜਿਸ ਸਮੇਂ ਉਸ ਨੂੰ ਜ਼ੀਰਕਪੁਰ ਦੇ ਝੂਠੇ ਕੇਸ ਵਿਚ ਫਸਾਇਆ ਗਿਆ ਸੀ, ਉਸ ਸਮੇਂ ਕਪੂਰ ਅਤੇ ਉਸ ਦੇ ਸਾਥੀਆਂ ਨੇ ਮਿਲ ਕੇ ਹਰਿਆਣਾ ਦੇ ਇੱਕ ਬੈਂਕ ਵਿਚ ਲਾਕਰ ਖੋਲ੍ਹਿਆ ਸੀ।
ਇਸ ਮਾਮਲੇ ‘ਚ ਕਪੂਰ ਨੇ ਵਿਜੀਲੈਂਸ ਨੂੰ ਦੱਸਿਆ ਸੀ ਕਿ ਉਸ ਨੇ ਕਰਨਾਲ ਦੇ ਜੁਲਰ ਤੋਂ ਖਰੀਦੇ ਗਹਿਣਿਆਂ ਦੀ ਅਦਾਇਗੀ ਉਸ ਦੇ ਕ੍ਰੈਡਿਟ ਕਾਰਡ ਰਾਹੀਂ ਕੀਤੀ ਸੀ ਪਰ ਪੀੜਤ ਔਰਤ ਨੇ ਗਹਿਣਿਆਂ ਦਾ ਸਾਰਾ ਬਿੱਲ ਆਪਣੇ ਨਾਂ ‘ਤੇ ਵਿਜੀਲੈਂਸ ਨੂੰ ਸੌਂਪ ਦਿੱਤਾ।
ਸੈਕਟਰ-88 ‘ਚ 6 ਕਰੋੜ ਦੀ ਕੋਠੀ ਦੀ 88 ਲੱਖ ‘ਚ ਹੋਈ ਰਜਿਸਟਰੀ
ਵਿਜੀਲੈਂਸ ਟੀਮ ਨੇ ਕਪੂਰ ਦੀ ਸੈਕਟਰ-88 ਸਥਿਤ ਕੋਠੀ ਦੀ ਪਿਛਲੇ ਕੁਝ ਦਿਨ ਪਹਿਲਾਂ FIR ਦਰਜ ਹੋਣ ਤੋਂ ਪਹਿਲਾਂ ਜਾਂਚ ਕੀਤੀ ਸੀ। ਪਤਾ ਲੱਗਾ ਹੈ ਕਿ 1 ਕਨਾਲ ਜ਼ਮੀਨ ‘ਤੇ ਬਣੀ ਇਸ ਕੋਠੀ ਦੀ ਕੀਮਤ ਕਰੀਬ 6 ਤੋਂ 7 ਕਰੋੜ ਰੁਪਏ ਹੈ। ਇਸ ਗੱਲ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਕਪੂਰ ਨੇ ਇਸ ਕੋਠੀ ਦੀ ਰਜਿਸਟਰੀ ਸਿਰਫ਼ 88 ਲੱਖ ਵਿੱਚ ਕਿਵੇਂ ਕਰਵਾਈ।
ਡੀਐਸਪੀ ਪਵਨ ਗ੍ਰਿਫ਼ਤ ਤੋਂ ਦੂਰ, ਦੂਜਾ ਡੀਐਸਪੀ ਪਹਿਲਾਂ ਹੀ ਪਹੁੰਚਿਆ ਵਿਦੇਸ਼
ਕਪੂਰ ਤੋਂ ਇਲਾਵਾ ਜ਼ੀਰਕਪੁਰ ਥਾਣੇ ਦੇ ਤਤਕਾਲੀ ਐਸਐਚਓ (ਮੌਜੂਦਾ ਡੀਐਸਪੀ) ਪਵਨ ਕੁਮਾਰ ਅਤੇ ਮੌਜੂਦਾ ਏਐਸਆਈ ਹਰਜਿੰਦਰ ਸਿੰਘ ਨੂੰ ਵਿਜੀਲੈਂਸ ਵੱਲੋਂ ਐਫਆਈਆਰ ਵਿੱਚ ਨਾਮਜ਼ਦ ਕੀਤਾ ਗਿਆ ਸੀ। ਪਰ ਇਨ੍ਹਾਂ ਤਿੰਨਾਂ ਤੋਂ ਇਲਾਵਾ ਡੀਐਸਪੀ ਸਮਰ ਪਾਲ ਵੀ ਜ਼ੀਰਕਪੁਰ ਥਾਣੇ ਵਿੱਚ ਜਾ ਕੇ ਮਹਿਲਾ ਦੋਸਤ ਨੂੰ ਧਮਕੀਆਂ ਦਿੰਦੇ ਸੀ। ਦੱਸ ਦਈਏ ਕਿ ਐਫਆਈਆਰ ਦਰਜ ਹੋਣ ਤੋਂ ਕੁਝ ਦਿਨ ਪਹਿਲਾਂ ਉਹ ਵਿਦੇਸ਼ ਗਿਆ ਸੀ।
