Drone Taxi: ਸੜਕਾਂ ‘ਤੇ ਲੰਬੇ ਜਾਮ ‘ਚ ਫਸਣ ਤੋਂ ਬਾਅਦ ਤੁਹਾਡੇ ਦਿਮਾਗ ‘ਚ ਇਹ ਜ਼ਰੂਰ ਆਇਆ ਹੋਵੇਗਾ ਕਿ ਕਾਸ਼ ਅਸੀਂ ਉੱਡ ਸਕਦੇ। ਪਰ ਤੁਹਾਨੂੰ ਇਹ ਜਾਣ ਕੇ ਹੈਰਾਨੀ ਹੋਵੇਗੀ ਕਿ ਹੁਣ ਤੁਹਾਡਾ ਸੁਪਨਾ ਹਕੀਕਤ ਬਣਨ ਜਾ ਰਿਹਾ ਹੈ। ਜੀ ਹਾਂ, ਜਲਦੀ ਹੀ ਤੁਸੀਂ ਡਰੋਨ ਟੈਕਸੀ ਰਾਹੀਂ ਇੱਕ ਥਾਂ ਤੋਂ ਦੂਜੀ ਥਾਂ ਜਾ ਸਕੋਗੇ। ਡਰੋਨ ਟੈਕਸੀ ਦੀ ਪਹਿਲੀ ਉਡਾਣ 10 ਨਵੰਬਰ 2022 ਨੂੰ ਪੈਰਿਸ ਦੇ ਬਾਹਰ ਇੱਕ ਏਅਰਫੀਲਡ ‘ਤੇ ਹੋਈ, ਜੋ ਸਫਲ ਰਹੀ।
ਡਰੋਨ ਟੈਕਸੀ ਦੀ ਸ਼ੁਰੂਆਤ ਜਰਮਨੀ ਦੀ ਕੰਪਨੀ Volocopter ਨੇ ਕੀਤੀ। ਇਸ ਡਰੋਨ ਟੈਕਸੀ ਦਾ ਨਾਂ Volocity ਰੱਖਿਆ ਗਿਆ। ਇਸ ਵਿਸ਼ਾਲ ਡਰੋਨ ‘ਚ ਅੱਠ ਰੋਟਰ ਹਨ। ਪਰੀਖਣ ਦੌਰਾਨ, ਇਸ ਨੇ ਪੈਰਿਸ ਦੇ ਬਾਹਰ ਪੋਂਟੋ-ਕੋਰਮੀਲੇਸ ਏਅਰਫੀਲਡ ਤੋਂ ਉਡਾਣ ਭਰੀ ਅਤੇ ਇੱਕ ਚੱਕਰ ਕੱਟ ਉਸੇ ਏਅਰਫੀਲਡ ‘ਤੇ ਵਾਪਸ ਆ ਗਈ।
ਵੋਲੋਕਾਪਟਰ ਕੰਪਨੀ ਦੇ ਸੀਈਓ ਡਰਕ ਹੌਕ ਦਾ ਕਹਿਣਾ ਹੈ ਕਿ ਅਗਲੇ 18 ਮਹੀਨਿਆਂ ‘ਚ ਇਸ ਡਰੋਨ ਟੈਕਸੀ ਦੇ ਕਈ ਟੈਸਟ ਕੀਤੇ ਜਾਣਗੇ। ਨਾਲ ਹੀ, ਵਪਾਰਕ ਉਡਾਣ ਲਈ ਸਰਟੀਫਿਕੇਟ ਲਏ ਜਾਣਗੇ। ਉਨ੍ਹਾਂ ਦਾਅਵਾ ਕੀਤਾ ਹੈ ਕਿ ਸਾਲ 2024 ‘ਚ ਛੋਟੀਆਂ ਵਪਾਰਕ ਉਡਾਣਾਂ ਹੋ ਸਕਦੀਆਂ ਹਨ। ਡਰੋਨ ਟੈਕਸੀ ਦੀ ਸ਼ੁਰੂਆਤ ਦਾ ਐਲਾਨ ਪੈਰਿਸ ਸਮਰ ਓਲੰਪਿਕ ਖੇਡਾਂ (Paris Summer Olympic Games) ਦੌਰਾਨ ਦੁਨੀਆ ਨੂੰ ਆਵਾਜਾਈ ਦੇ ਅਗਲੇ ਪੱਧਰ ‘ਤੇ ਲਿਜਾਣ ਲਈ ਕੀਤਾ ਜਾਵੇਗਾ।
ਦੱਸ ਦਈਏ ਕਿ ਇਹ ਪੂਰੀ ਤਰ੍ਹਾਂ ਆਟੋਮੈਟਿਕ ਵੇਲੋਸਿਟੀ ਇੱਕ ਦੋ ਸੀਟਰ ਡਰੋਨ ਟੈਕਸੀ ਹੈ, ਜੋ ਇੱਕ ਨਿਸ਼ਚਿਤ ਸਥਾਨ ਤੋਂ ਉਡਾਣ ਭਰ ਦੂਜੀ ਥਾਂ ਜਾਣ ‘ਚ ਸਮਰੱਥ ਹੈ। ਇਸ ਨੂੰ ਟੈਸਟ ਦੌਰਾਨ ਸਿਰਫ਼ ਇੱਕ ਵਿਅਕਤੀ ਬਿਠਾ ਕੇ ਉਡਾਇਆ ਗਿਆ। ਟੈਸਟ ਦੌਰਾਨ, ਵੋਲੋਸਿਟੀ ਨੂੰ ਪਾਇਲਟ ਪਾਲ ਸਟੋਨ ਨੇ ਉਡਾਇਆ।
ਪਾਲ ਨੇ ਦੱਸਿਆ ਕਿ ਇਹ ਡਰੋਨ ਡਿਜੀਟਲ ਫਲਾਈ-ਬਾਈ ਵਾਇਰ ਸਿਸਟਮ ‘ਤੇ ਕੰਮ ਕਰਦਾ ਹੈ। ਸਾਧਾਰਨ ਹੈਲੀਕਾਪਟਰ ਉਡਾਉਣ ਸਮੇਂ ਸਿਰ ਦੇ ਉੱਪਰ ਵਾਲੇ ਬਟਨ ਦਬਾਉਣੇ ਪੈਂਦੇ ਹਨ ਤੇ ਟਿੱਢ ਦੇ ਸਾਹਮਣੇ ਕੀਬੋਰਡ ਨੂੰ ਕੰਟਰੋਲ ਕਰਨਾ ਪੈਂਦਾ ਹੈ। ਨਾਲ ਹੀ ਤਾਲਮੇਲ ਵੀ ਕਰਨਾ ਪੈਂਦਾ ਹੈ ਪਰ ਇਸ ਡਰੋਨ ਵਿੱਚ ਇਹ ਸਭ ਬਹੁਤ ਆਸਾਨ ਹੈ। ਯਾਨੀ ਇਸ ਨੂੰ ਉਡਾਣਾ ਕਿਸੇ ਵੀ ਸਾਧਾਰਨ ਹੈਲੀਕਾਪਟਰ ਨਾਲੋਂ ਬਹੁਤ ਆਸਾਨ ਹੈ।
