ਜਨਰਲ ਜੇ ਜੇ ਸਿੰਘ ਨੇ ਕੈਪਟਨ ਅਮਿਰੰਦਰ ‘ਤੇ ਪਲਟਵਾਰ ਕੀਤਾ ਹੈ। ਬੀਤੇ ਦਿਨ ਮੁੱਖ ਮੰਤਰੀ ਕੈਪਟਨ ਨੇ ਕਾਂਗਰਸੀ ਵਿਧਾਇਕ ਨਵਜੋਤ ਸਿੰਘ ਸਿੱਧੂ ਨੂੰ ਚੈਲੰਜ ਕਰਦਿਆਂ ਜਨਰਲ ਜੇ ਜੇ ਸਿੰਘ ਦੀ ਉਦਾਹਰਨ ਦਿੱਤੀ ਸੀ ਤੇ ਉਸ ਉਦਾਹਰਨ ਦਾ ਹੁਣ ਜਨਰਲ ਜੇ ਜੇ ਸਿੰਘ ਨੇ ਕੈਪਟਨ ਨੂੰ ਬੜਾ ਤਿੱਖਾ ਜਵਾਬ ਦਿੱਤਾ ਹੈ। ਜੇ ਜੇ ਸਿੰਘ ਨੇ ਕੈਪਟਨ ‘ਤੇ ਬਾਦਲਾਂ ਨਾਲ ਘਿਉ ਖਿਚੜੀ ਅਤੇ 2017 ਦੀਆਂ ਚੋਣਾਂ ਮੌਕੇ “ਮੈਚ ਫਿਕਸਿੰਗ” ਜਿਹੇ ਇਲਜ਼ਾਮ ਲਾਏ।
“ਸਾਰਾ ਪੰਜਾਬ ਇਸ ਗੱਲ ਤੋਂ ਜਾਣੂ ਹੈ, ਤੂਸੀ ਬਾਦਲਾਂ ਨਾਲ਼ ਘਿਓ ਖਿਚੜੀ ਹੋ । 2017 ਦੀਆਂ ਚੋਣਾਂ ਵਿੱਚ ਬਾਦਲਾਂ ਨੇ ਸਾਜਿਸ਼ ਤਹਿਤ, ਤੁਹਾਡੀ ਮਦਦ ਕੀਤੀ , ਜਿਸਦਾ ਕਰਜ਼ ਤੁਸੀਂ ਬਹਿਬਲ ਕਲਾਂ ਗੋਲ਼ੀ ਕਾਂਡ ਵਿੱਚ ਕਾਰਵਾਈ ਨਾਂ ਕਰਕੇ ਚੁਕਾ ਰਹੇ ਹੋ। 2017 ਵਿਧਾਨ ਸਭਾ ਚੋਣ ‘ਚ ਪਟਿਆਲਾ ਅਤੇ ਲੰਬੀ ਦੀ ਸੀਟ ‘ਤੇ ਫ਼ਿਕਸ ਮੈਚ ਸੀ, ਇਹ ਗੱਲ ਕਿਸੇ ਤੋਂ ਲੂਕੀ ਨਹੀਂ ਹੈ। ਸਮਾਂ ਬਦਲਦਾ ਰਹਿੰਦਾ ਹੈ, ਭੁੱਲੋ ਨਾਂ ਕਦੇ ਤੁਸੀਂ ਵੀ ਪਟਿਆਲ਼ੇ ਤੋਂ ਜ਼ਮਾਨਤ ਜ਼ਬਤ ਕਰਾਈ ਹੈ। ਮੈਂ ਤਾਂ ਇਕ ਮਾਮੂਲੀ ਜਿਹੀ ਚੋਣ ਹਾਰਿਆਂ ਹਾਂ,ਪਰ ਤੁਸੀਂ ਜ਼ਮੀਰ ਹਾਰ ਚੁੱਕੇ ਹੋ।”
ਤੁਹਾਨੂੰ ਦੱਸ ਦਈਏ ਕਿ ਬੀਤੇ ਦਿਨ ਮੁੱਖ ਮੰਤਰੀ ਕੈਪਟਨ ਨਵਜੋਤ ਸਿੱਧੂ ‘ਤੇ ਖੁੱਲ੍ਹ ਕੇ ਵਰ੍ਹੇ ਸੀ । ਨਵਜੋਤ ਨੇ ਇੱਥੋਂ ਤੱਕ ਕਹਿ ਦਿੱਤਾ ਕਿ ਜਿੰਨੀ ਛੇਤੀ ਸਿੱਧੂ ਕਾਂਗਰਸ ਚੋਂ ਜਾਣਾ ਚਾਹੁੰਦੇ ਹਨ ਜਾ ਸਕਦੇ ਹਨ। ਇਸਦੇ ਨਾਲ ਹੀ ਮੁੱਖ ਮੰਤਰੀ ਕੈਪਟਨ ਨੇ ਸਿੱਧੂ ਨੂੰ ਚੁਣੌਤੀ ਦਿੰਦਿਆ ਕਿਹਾ ਕਿ ਸਿੱਧੂ ਨੇ ਮੇਰੇ ਨਾਲ ਲੜਨਾ ਤਾਂ ਸ਼ੌਕ ਨਾਲ ਲੜੇ, ਪਟਿਆਲਾ ਤੋਂ ਮੇਰੇ ਖਿਲਾਫ਼ ਚੋਣ ਲੜੇ ਸਿੱਧੂ ਦਾ ਵੀ ਓਹੀ ਹਸ਼ਰ ਹੋਵੇਗਾ ਜੋ ਜਨਰਲ ਜੇਜੇ ਸਿੰਘ ਦਾ ਹੋਇਆ ਸੀ, ਸਿੱਧੂ ਦੀ ਵੀ ਜ਼ਮਨਾਤ ਜ਼ਬਤ ਹੋਵੇਗੀ।
