ਪੰਜਾਬ ‘ਚ 2022 ਵਿਧਾਨ ਸਭਾ ਚੋਣਾਂ ਜਿਵੇਂ-ਜਿਵੇਂ ਨੇੜੇ ਆ ਰਹੀਆਂ ਹਨ।ਸਾਰੀਆਂ ਸਿਆਸੀ ਪਾਰਟੀਆਂ ਸੱਤਾ ‘ਚ ਆਉਣ ਲਈ ਹਥਕੰਡੇ ਅਪਣਾ ਰਹੀਆਂ ਹਨ, ਜਨਤਾ ਨੂੰ ਲੁਭਾਵਣੇ ਵਾਅਦੇ ਕਰਕੇ ਭਰਮਾ ਰਹੀਆਂ ਹਨ।ਇਸੇ ਤਰ੍ਹਾਂ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਪੰਜਾਬ ‘ਚ ਆਪਣੀ ਸੱਤਾ ਕਾਇਮ ਕਰਨ ਲਈ ਪੰਜਾਬ ਦੇ ਲੋਕਾਂ ਨੂੰ ਆਪਣੇ ਵੱਲ ਆਕਰਸ਼ਿਤ ਕਰਨ ‘ਚ ਲੱਗੇ ਹੋਏ ਹਨ।
ਪੰਜਾਬ ਦੇ ਲਗਾਤਾਰ ਦੌਰੇ ਕਰ ਰਹੇ ਹਨ, ਦੱਸ ਦੇਈਏ ਕਿ ਅੱਜ ਵੀ ਕੇਜਰੀਵਾਲ ਚੰਡੀਗੜ੍ਹ ਫੇਰੀ ‘ਤੇ ਜਿੱਥੇ ਉਨ੍ਹਾਂ ਨੇ ਪ੍ਰਦਰਸ਼ਨ ਕਰ ਰਹੇ ਅਧਿਆਪਕਾਂ ਨਾਲ ਮੁਲਾਕਾਤ ਕੀਤੀ।ਇਸ ਨੂੰ ਲੈ ਕੇ ਪੰਜਾਬ ਦੇ ਸਾਬਕਾ ਡਿਪਟੀ ਸਪੀਕਰ ਬੀਰ ਦਵਿੰਦਰ ਸਿੰਘ ਨੇ ਕੇਜਰੀਵਾਲ ‘ਤੇ ਨਿਸ਼ਾਨਾ ਸਾਧਿਆ ਹੈ।ਬੀਰ ਦਵਿੰਦਰ ਨੇ ਕੇਜਰੀਵਾਲ ਅਤੇ ਭਗਵੰਤ ਮਾਨ ਵਲੋਂ ਸਾਂਝੇ ਤੌਰ ‘ਤੇ ਜਾਰੀ ਕੀਤੇ ਇੱਕ ਇਸ਼ਤਿਹਾਰ ‘ਤੇ ਤਿੱਖਾ ਵਾਰ ਕੀਤਾ ਤੇ ਸਵਾਲ ਕੀਤਾ ਹੈ, ਕਿ ਇਸ ਇਸ਼ਤਿਹਰ ‘ਚ ਕੇਜਰੀਵਾਲ ਕਿਸ ਅਧਾਰ ‘ਤੇ ਪੰਜਾਬ ‘ਚ’ਕੇਜਰੀ-ਰਾਜ’ ਸਥਾਪਤ ਕਰਨ ਲਈ ਮੌਕਾ ਮੰਗ ਰਿਹਾ ਹੈ?
ਕੀ ਪੰਜਾਬ ਦੀ ਆਮ ਆਦਮੀ ਪਾਰਟੀ ਦੀ ਇਕਾਈ ‘ਚ, ਇੱਕ ਵੀ ਅਜਿਹਾ ਪਰਪੱਕ ਆਗੂ ਨਹੀਂ ਜਿਸਦੇ ਨਾਮ ਤੇ ਪਛਾਣ ‘ਤੇ ਪੰਜਾਬ ‘ਚ ਵੋਟਾਂ ਮੰਗੀਆਂ ਜਾ ਸਕਣ? ਕੀ ਕੇਜਰੀਵਾਲ ਪੰਜਾਬ ‘ਚ ਆਪਣੀ ਬੰਧੂਆ ਸਰਕਾਰ ਸਥਾਪਤ ਕਰਨਾ ਚਾਹੁੰਦੇ ਹਨ, ਜਿਸ ਨੂੰ ਉਹ ਦਿੱਲੀ ਬੈਠਕੇ ਆਪਣੇ ਇਸ਼ਾਰਿਆਂ ਰਾਹੀਂ ਨਿਯੰਤਰਿਤ ਕਰ ਸਕਣ ਜਾਂ ਖੁਦ ਹੀ ਪੰਜਾਬ ਦੀ ਜਨਤਾ ਨੂੰ ਭੁਲ਼ੇਖੇ ‘ਚ ਰੱਖ ਕੇ ਪੰਜਾਬ ਦੀ ਗੱਦੀ ਨੂੰ ਹੜੱਪਣ ਦੀ ਮਨਸ਼ਾ ਰਖਦੇ ਹਨ?
ਸ਼ਾਇਦ ਇਸੇ ਹੀ ਭਰਮ ਅਧੀਨ ਉਹ ਆਪਣੇ ਦਿੱਲੀ -ਰਾਜ ਦੇ ਅਧੂਰੇ ਸੁਪਨੇ ਪੂਰੇ ਕਰਨ ਲਈ, ਪੰਜਾਬ ਦੇ ਲੋਕਾਂ ਦੇ ਭੋਲੇਪਣ ਨੂੰ ਵਰਤਣ ਦੀ ਤਾਕ ‘ਚ ਹਨ।ਬੀਰ ਦਵਿੰਦਰ ਸਿੰਘ ਨੇ ਕੇਜਰੀਵਾਲ ਨੂੰ ਚੁਣੌਤੀ ਦਿੰਦਿਆਂ ਕਿਹਾ ਕਿ ਅਜਿਹਾ ਹਰਗਿਜ਼ ਨਹੀਂ ਹੋਵੇਗਾ ਤੇ ਨਾ ਹੀ ਅਜਿਹਾ ਹੋਂਣ ਦਿੱਤਾ ਜਾਵੇਗਾ।
ਉਨ੍ਹਾਂ ਜ਼ੋਰ ਦਿੰਦਿਆ ਕਿਹਾ, ਕਿ ਪੰਜਾਬ ਦੇ ਲੋਕ ਪੰਜਾਬ ਦੀ ਸੱਤਾ ਦੇ ਗਲਿਆਰਿਆਂ ਵਿੱਚ, ਕਿਸੇ ਵੀ ਗ਼ੈਰ-ਪੰਜਾਬੀ ਦੇ ਅਯੋਗ ਦਖਲ ਅਤੇ ਨਾਜਾਇਜ਼ ਕਬਜਾ ਕਰਨ ਦੀ ਕਿਸੇ ਵੀ ਸਾਜਿਸ਼ ਨੂੰ ਕਬੂਲ ਨਹੀਂ ਕਰਨਗੇ। ਉਨ੍ਹਾਂ ਬੜੇ ਤਲਖ਼ ਲਹਿਜ਼ੇ ਨਾਲ ਕਿਹਾ ਕਿ, ‘ਕੇਜਰੀਵਾਲ ਕੌਣ ਹੁੰਦਾ ਹੈ ਪੰਜਾਬ ਦੇ ਆਵਾਮ ਨੂੰ ਗਰੰਟੀਆਂ ਦੇਣ ਵਾਲਾ, ਉਹ ਕਿਸ ਹੈਸੀਅਤ ਵਿੱਚ ਅਜੇਹੀਆ ਬੇਥਵੀਆਂ ਗਰੰਟੀਆਂ ਦੇ ਰਹੇ ਹਨ, ਕੀ ਉਨ੍ਹਾਂ ਨੂੰ ਇਸ ਗੱਲ ਦਾ ਇਲਮ ਨਹੀਂ ਕਿ ਪੰਜਾਬ ਇੱਕ ਸਰਹੱਦੀ ਸੂਬਾ ਹੈ ਅਤੇ ਸੰਵਿਧਾਨ ਦੇ ਸਾਰੇ ਤਕਾਜ਼ਿਆਂ ਅਨੁਸਾਰ ਇੱਕ ‘ਪੂਰਨ-ਰਾਜ’ ਹੈ ਅਤੇ ਤੁਹਾਡੀ ‘ਦਿੱਲੀ’ ਦੇਸ਼ ਦੀ ਕੌਮੀ ਰਾਜਧਾਨੀ ਦਾ ਨਿਸ਼ਚਿਤ ਇਲਾਕਾ, ਕੇਵਲ ਇੱਕ ‘ਕੇਂਦਰ ਸਾਸ਼ਕ ਰਿਆਸਤ’ ਹੈ, ਜਿਸਦੇ ਆਰਥਿਕ ਵਸੀਲਿਆਂ ਅਤੇ ਵਿੱਤੀ ਸਾਧਨਾ ਦੀ ਤੁਲਨਾ, ਪੰਜਾਬ ਦੀਆਂ ਵਿਗੱਠਣ ਪਰਸਥਿੱਤੀਆਂ ਅਤੇ ਇਸ ਦੀ ਵਿਸ਼ਾਲਤਾ ਨਾਲ ਕਿਸੇ ਵੀ ਸੰਧਰਵ ਵਿੱਚ ਨਹੀਂ ਕੀਤੀ ਜਾ ਸਕਦੀ।
