ਅੱਜ ਦੇ ਯੁੱਗ ‘ਚ ਆਨਲਾਈਨ ਗੇਮ ਖੇਡਣਾ ਇਕ ਆਮ ਜਿਹੀ ਗੱਲ ਹੋ ਗਈ ਹੈ ਅਤੇ ਇਸ ‘ਚ ਕੋਈ ਬੁਰਾਈ ਵੀ ਨਹੀਂ ਪਰ ਆਨਲਾਈਨ ਗੇਮ ਖੇਡਣਾ ਉਦੋਂ ਇਕ ਔਰਤ ਲਈ ਖਤਰਨਾਕ ਬਣ ਗਿਆ ਜਦੋਂ ਰਾਜਸਥਾਨ ਦੀ ਸ਼ਿਵਾਨੀ ਨਾਂ ਦੀ ਇਕ ਔਰਤ ਨੂੰ ਸਰਹੱਦ ਪਾਰ ਪਾਕਿਸਤਾਨ ‘ਚ ਰਹਿੰਦੇ ਇਕ ਵਿਅਕਤੀ ਨਾਲ ਪਿਆਰ ਹੋ ਗਿਆ। ਉਹ ਪਿਆਰ ‘ਚ ਇੰਨੀ ਅੰਨ੍ਹੀ ਹੋ ਗਈ ਕੀ ਉਹ ਆਪਣਾ ਘਰ-ਬਾਰ ਛੱਡ ਰਾਜਸਥਾਨ ਤੋਂ ਅੰਮ੍ਰਿਤਸਰ ਆ ਗਈ ਅਤੇ ਬਾਰਡਰ ਪਾਰ ਕਰਕੇ ਪਾਕਿਸਤਾਨ ਜਾਣ ਦੀ ਕੋਸ਼ਿਸ਼ ‘ਚ ਸੀ। ਔਰਤ ਦਾ ਕਹਿਣਾ ਹੈ ਕਿ ਇਕ ਲੜਕਾ ਉਸਨੂੰ ਇਥੋਂ ਲੈਣ ਆਉਣ ਵਾਲਾ ਸੀ ਪਰ ਉੱਥੇ ਕੋਈ ਵੀ ਵਿਅਕਤੀ ਨਾ ਆਉਣ ਕਾਰਨ ਉਹ ਪਰੇਸ਼ਾਨ ਹੋ ਗਈ ਅਤੇ ਜਿਸ ਤੋਂ ਬਾਅਦ ਉਹ ਪੁਲਸ ਦੇ ਸੰਪਰਕ ‘ਚ ਆਈ।
ਪੁਲਸ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਸ਼ਿਵਾਨੀ ਨਾਂ ਦੀ ਇਹ ਔਰਤ ਰਾਜਸਥਾਨ ਦੀ ਰਹਿਣ ਵਾਲੀ ਹੈ ਅਤੇ ਉਹ 10-12 ਦਿਨਾਂ ਤੋਂ ਆਨਲਾਈਨ ਲੁਡੋ ਗੇਮ ਰਾਹੀਂ ਪਾਕਿਸਤਾਨ ਦੇ ਇਕ ਲੜਕੇ ਨਾਲ ਸੰਪਰਕ ‘ਚ ਸੀ ਅਤੇ ਉਹ ਇਸ ਨੂੰ ਗੁੰਮਰਾਹ ਕਰ ਪਾਕਿਸਤਾਨ ਆਉਣ ਲਈ ਕਹਿ ਰਿਹਾ ਸੀ। ਇਸਦੇ ਪਿੱਛੇ ਉਨ੍ਹਾਂ ਵਿਅਕਤੀਆਂ ਦੇ ਕੀ ਮਨਸੂਬੇ ਸਨ ਉਸ ਦੀ ਹਾਲੇ ਪੁੱਸ਼ਟੀ ਨਹੀਂ ਹੋ ਸਕੀ ਹੈ।
