ਛੱਤੀਸਗੜ੍ਹ ਦੇ ਜਾਂਜਗੀਰ-ਚੰਪਾ ਜ਼ਿਲ੍ਹੇ ’ਚ 80 ਫੁੱਟ ਡੂੰਘੇ ਬੋਰਵੈੱਲ ’ਚੋਂ ਸੁਰੱਖਿਅਤ ਬਾਹਰ ਕੱਢੇ ਗਏ 10 ਸਾਲਾ ਰਾਹੁਲ ਸਾਹੂ ਦੀ ਹਿੰਮਤ ਦੀ ਤਾਰੀਫ਼ ਹੋ ਰਹੀ ਹੈ। ਰਾਹੁਲ ਦੇ ਪਿਤਾ ਰਾਮ ਕੁਮਾਰ ਸਾਹੂ ਨੇ ਕਿਹਾ ਕਿ ਮਾਨਸਿਕ ਰੂਪ ਤੋਂ ਕਮਜ਼ੋਰ ਹੋਣ ਦੇ ਬਾਵਜੂਦ ਉਸ ਨੇ ਹਮੇਸ਼ਾ ਹਿੰਮਤ ਵਿਖਾਉਂਦੇ ਹੋਏ ਸਾਈਕਲ ਚਲਾਉਣਾ, ਤੈਰਨਾ ਅਤੇ ਇੱਥੋਂ ਤੱਕ ਕਿ ਢੋਲ ਅਤੇ ਤਬਲਾ ਵਜਾਉਣਾ ਵੀ ਸਿੱਖਿਆ। ਲੰਬੀ ਬਚਾਅ ਮੁਹਿੰਮ ਮਗਰੋਂ ਮੰਗਲਵਾਰ ਦੇਰ ਰਾਤ ਬੋਰਵੈੱਲ ’ਚੋਂ ਬਾਹਰ ਕੱਢੇ ਗਏ ਰਾਹੁਲ ਦੇ ਪਿਤਾ ਨੇ ਕਿਹਾ ਕਿ ਆਪਣੀ ਇਸੇ ਤਾਕਤ ਦੀ ਮਦਦ ਨਾਲ ਉਹ 5 ਦਿਨ ਤੱਕ ਬੋਰਵੈੱਲ ਦੇ ਅੰਦਰ ਜਿਊਂਦਾ ਰਿਹਾ। NDRF ਦੇ ਇਕ ਅਧਿਕਾਰੀ ਨੇ ਕਿਹਾ ਕਿ ਬੋਰਵੈੱਲ ਦੇ ਅੰਦਰ ਇਕ ਸੱਪ ਅਤੇ ਬਿੱਛੂ ਸਨ, ਜਿਸ ਨੂੰ ਲੈ ਕੇ ਬਚਾਅ ਦਲ ਚਿੰਤਤ ਸਨ ਪਰ ਬੱਚੇ ਨੂੰ ਉਨ੍ਹਾਂ ਤੋਂ ਡਰ ਨਹੀਂ ਲੱਗਾ।
ਬਚਾਅ ਕਰਮੀਆਂ ਨੇ ਬੱਚੇ ਤੱਕ ਪਹੁੰਚਣ ਲਈ ਸਮਾਨਾਂਤਰ ਟੋਏ ਪੁੱਟਿਆ ਅਤੇ ਸੁਰੰਗ ਬਣਾਈ ਅਤੇ ਮੰਗਲਵਾਰ ਰਾਤ 11.55 ਵਜੇ ਉਸ ਨੂੰ ਬਾਹਰ ਕੱਢਿਆ ਗਿਆ। ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਇਕ ਅਧਿਕਾਰੀ ਨੇ ਦੱਸਿਆ ਕਿ ਲੜਕੇ ਨੂੰ ਹਸਪਤਾਲ ਲਿਜਾਇਆ ਗਿਆ ਅਤੇ ਉਸ ਦੀ ਹਾਲਤ ਸਥਿਰ ਹੈ। ਬੁੱਧਵਾਰ ਸਵੇਰੇ ਮੁੱਖ ਮੰਤਰੀ ਦਫ਼ਤਰ ਨੇ ਰਾਹੁਲ ਦੀ ਤਸਵੀਰ ਟਵੀਟ ਕਰਦਿਆਂ ਲਿਖਿਆ: ‘‘ਜਾਂਜਗੀਰ ਦੇ ਬਹਾਦਰ ਰਾਹੁਲ ਸਾਹੂ ਸੌਂ ਕੇ ਉੱਠ ਗਏ ਹਨ।
ਉਨ੍ਹਾਂ ਨੇ ਨਾਸ਼ਤਾ ਵੀ ਕਰ ਲਿਆ ਹੈ। ਉਨ੍ਹਾਂ ਨੂੰ ਹਲਕਾ ਜਿਹਾ ਬੁਖ਼ਾਰ ਹੈ, ਬਾਕੀ ਠੀਕ ਹੈ।’’ ਬਚਾਅ ਮੁਹਿੰਮ ’ਚ ਕਈ ਚੁਣੌਤੀਆਂ ਸਨ ਪਰ ਬਚਾਅ ਟੀਮ ਦੇ ਸਮਰਪਣ ਅਤੇ ਬੱਚੇ ਦੀ ਹਿੰਮਤ ਦੇ ਸਾਹਮਣੇ ਕੋਈ ਚੁਣੌਤੀ ਨਹੀਂ ਟਿਕ ਸਕੀ। ਸੂਬੇ ਦੀ ਰਾਜਧਾਨੀ ਰਾਏਪੁਰ ਤੋਂ 200 ਕਿਲੋਮੀਟਰ ਦੂਰ ਜਾਂਜਗੀਰ-ਚੰਪਾ ਜ਼ਿਲ੍ਹੇ ਦੇ ਪਿਹਰੀਦ ਪਿੰਡ ਬੀਤੇ ਸ਼ੁੱਕਰਵਾਰ ਨੂੰ ਉਸ ਸਮੇਂ ਦੇਸ਼-ਵਿਦੇਸ਼ ’ਚ ਚਰਚਾ ’ਚ ਆ ਗਿਆ, ਜਦੋਂ ਰਾਹੁਲ ਆਪਣੇ ਘਰ ਦੇ ਪਿੱਛੇ ਫਿਸਲ ਕੇ 80 ਫੁੱਟ ਡੂੰਘੇ ਬੋਰਵੈੱਲ ’ਚ ਡਿੱਗ ਗਿਆ ਸੀ ਅਤੇ ਲੱਗਭਗ 69 ਫੁੱਟ ਡੂੰਘਾਈ ’ਚ ਫਸ ਗਿਆ ਸੀ।
ਲੱਗਭਗ 5 ਦਿਨਾਂ ਤੱਕ ਕਈ ਚੁਣੌਤੀਆਂ ਦਾ ਸਾਹਮਣਾ ਕਰਨ ਦੇ ਬਾਵਜੂਦ ਨਾ ਤਾਂ ਬਚਾਅ ਦਲ ਅਤੇ ਨਾ ਹੀ ਰਾਹੁਲ ਨੇ ਹਿੰਮਤ ਹਾਰੀ। ਕਈ ਏਜੰਸੀਆਂ ਦੇ 500 ਤੋਂ ਵੱਧ ਕਰਮੀਆਂ ਦੀ ਇਕ ਸਾਂਝੀ ਟੀਮ ਨੇ 104 ਘੰਟੇ ਦੀ ਸਖ਼ਤ ਮੁਸ਼ੱਕਤ ਮਗਰੋਂ ਮੰਗਲਵਾਰ ਦੇਰ ਰਾਤ ਉਸ ਨੂੰ ਬਚਾ ਲਿਆ। ਰਾਹੁਲ ਨੂੰ ਗੁਆਂਢੀ ਬਿਲਾਸਪੁਰ ਜ਼ਿਲ੍ਹੇ ਦੇ ਇਕ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ ਹੈ, ਜਿੱਥੇ ਉਸ ਦੇ ਨਾਲ ਉਸ ਦੀ ਮਾਂ ਅਤੇ ਪਰਿਵਾਰ ਦੇ ਕੁਝ ਮੈਂਬਰ ਹਨ। ਰਾਹੁਲ ਦੇ ਪਿਤਾ ਦੇ ਸੁੱਖ ਦਾ ਸਾਹ ਲੈਂਦੇ ਹੋਏ ਕਿਹਾ ਕਿ ਮੇਰਾ ਪੁੱਤਰ ਮਾਨਸਿਕ ਰੂਪ ਤੋਂ ਥੋੜ੍ਹਾ ਕਮਜ਼ੋਰ ਹੈ ਅਤੇ ਠੀਕ ਨਾਲ ਗੱਲ ਨਹੀਂ ਕਰ ਪਾਉਂਦਾ।
