ਓਮ ਪ੍ਰਕਾਸ਼ ਚੌਟਾਲਾ ਤਿਹਾੜ ਜੇਲ੍ਹ ਵਿੱਚ ਬੰਦ 19,584 ਕੈਦੀਆਂ ਵਿੱਚੋਂ ਸਭ ਤੋਂ ਬਜ਼ੁਰਗ ਹਨ। ਸੀਬੀਆਈ ਦੀ ਵਿਸ਼ੇਸ਼ ਅਦਾਲਤ ਨੇ ਬੀਤੇ ਦਿਨੀਂ ਚੌਟਾਲਾ ਨੂੰ ਆਮਦਨ ਤੋਂ ਵੱਧ ਜਾਇਦਾਦ ਦੇ ਮਾਮਲੇ ਵਿੱਚ ਦੋਸ਼ੀ ਕਰਾਰ ਦਿੰਦਿਆਂ ਚਾਰ ਸਾਲ ਦੀ ਸਜ਼ਾ ਸੁਣਾਈ ਸੀ। ਇਸ ਤੋਂ ਇਲਾਵਾ ਅਦਾਲਤ ਵੱਲੋਂ ਚੌਟਾਲਾ ਨੂੰ 50 ਲੱਖ ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ ਗਿਆ ਹੈ।
ਦੱਸ ਦਈਏ ਕਿ ਜੇਲ੍ਹ ਦੇ ਰਿਕਾਰਡ ਅਨੁਸਾਰ ਚੌਟਾਲਾ 80 ਸਾਲ ਤੋਂ ਵੱਧ ਉਮਰ ਦੇ ਸੱਤ ਕੈਦੀਆਂ ਵਿੱਚੋਂ ਇੱਕ ਹੈ। ਇਸ ਤੋਂ ਇਲਾਵਾ ਜੇਲ੍ਹ ਵਿੱਚ 70 ਤੋਂ 80 ਸਾਲ ਦੀ ਉਮਰ ਦੇ 63 ਹੋਰ ਕੈਦੀ ਹਨ। ਸਜ਼ਾ ਸੁਣਾਏ ਜਾਣ ਤੱਕ ਜੇਲ੍ਹ ਵਿੱਚ 85 ਸਾਲਾਂ ਸਭ ਤੋਂ ਬਜ਼ੁਰਗ ਕੈਦੀ ਸੀ। ਜੇਲ੍ਹ ਦੇ ਸੀਨੀਅਰ ਅਧਿਕਾਰੀਆਂ ਦੇ ਅਨੁਸਾਰ ਚੌਟਾਲਾ ਨੂੰ ਜੇਲ੍ਹ ਨੰਬਰ 2 ਰੱਖਿਆ ਗਿਆ, ਜਿੱਥੇ ਉਸ ਨੂੰ ਦੋ ਹੋਰ ਕੈਦੀਆਂ ਦੇ ਨਾਲ ਇਕ ਕੋਠੜੀ ‘ਚ ਰੱਖਿਆ ਗਿਆ।
‘ਬਜ਼ੁਰਗ ਕੈਦੀਆਂ ਨੂੰ ਮਿਲਦਾ ਹੈ ਇੱਕ ਬਿਸਤਰ’
ਬੁਢਾਪੇ ਅਤੇ ਸਿਹਤ ਕਾਰਨਾਂ ਕਰਕੇ ਚੌਟਾਲਾ 70 ਸਾਲ ਤੋਂ ਵੱਧ ਉਮਰ ਦੇ ਹੋਰ ਕੈਦੀਆਂ ਵਾਂਗ ਬਿਸਤਰੇ ਦੇ ਹੱਕਦਾਰ ਹੋਣਗੇ। ਵੱਡੀ ਉਮਰ ਦੇ ਕੈਦੀਆਂ ਨੂੰ ਜੇਲ੍ਹ ਦੀਆਂ ਫੈਕਟਰੀਆਂ ਵਿੱਚ ਵੀ ਕੋਈ ਕੰਮ ਨਹੀਂ ਦਿੱਤਾ ਜਾਂਦਾ। ਇੱਕ ਜੇਲ੍ਹ ਅਧਿਕਾਰੀ ਨੇ ਦੱਸਿਆ, “ਆਮ ਤੌਰ ‘ਤੇ ਡਾਕਟਰ ਦੀ ਸਲਾਹ ‘ਤੇ, ਅਸੀਂ ਬਜ਼ੁਰਗ ਕੈਦੀਆਂ ਲਈ ਬਿਸਤਰੇ ਦੀ ਇਜਾਜ਼ਤ ਦਿੰਦੇ ਹਾਂ। ਇਸੇ ਤਰ੍ਹਾਂ ਚੌਟਾਲਾ ਦੇ ਕੇਸ ਵਿੱਚ ਵੀ ਇੱਕ ਬਿਸਤਰਾ ਦਿੱਤਾ ਜਾਵੇਗਾ। ਬੈੱਡ ਜੇਲ੍ਹ ਫੈਕਟਰੀ ਦਾ ਹੈ। ਅਸੀਂ ਇਹ ਵੀ ਯਕੀਨੀ ਬਣਾਉਂਦੇ ਹਾਂ ਕਿ ਬਜ਼ੁਰਗ ਕੈਦੀਆਂ ਦੀ ਦੇਖਭਾਲ ਕਰਨ ਵਾਲਾ ਕੋਈ ਹੋਵੇ। ਚੰਗੇ ਆਚਰਣ ਵਾਲੇ ਕੈਦੀ ਜੋ ਬਜ਼ੁਰਗਾਂ ਦੀ ਮਦਦ ਕਰਨਾ ਚਾਹੁੰਦੇ ਹਨ, ਨੂੰ ਅਜਿਹੇ ਕੰਮ ਸੌਂਪੇ ਜਾਂਦੇ ਹਨ। ਇਹ ਜੇਲ੍ਹ ਸੁਪਰਡੈਂਟ ਦੁਆਰਾ ਸੌਂਪਿਆ ਗਿਆ ਇੱਕ ਸਵੈ-ਇੱਛਤ ਕੰਮ ਹੈ।”
‘ਨੌਜਵਾਨ ਕੈਦੀ ਬਜ਼ੁਰਗ ਕੈਦੀਆਂ ਦੀ ਕਰਦੇ ਹਨ ਮਦਦ’
ਅਧਿਕਾਰੀ ਨੇ ਕਿਹਾ ਕਿ ਨੌਜਵਾਨ ਕੈਦੀ ਬਜ਼ੁਰਗ ਕੈਦੀਆਂ ਨੂੰ ਕੱਪੜੇ ਧੋਣ ਅਤੇ ਹੋਰ ਰੋਜ਼ਾਨਾ ਦੇ ਕੰਮਾਂ ਵਿੱਚ ਮਦਦ ਕਰਦੇ ਹਨ। ਜੇਲ੍ਹ ਅਧਿਕਾਰੀ ਨੇ ਕਿਹਾ, “ਉਹ ਬਜ਼ੁਰਗਾਂ ਦੀ ਸਿਹਤ ਦੀ ਨਿਗਰਾਨੀ ਵੀ ਕਰਦੇ ਹਨ ਅਤੇ ਇਹ ਯਕੀਨੀ ਬਣਾਉਂਦੇ ਹਨ ਕਿ ਕਿਸੇ ਵੀ ਐਮਰਜੈਂਸੀ ਦੀ ਸਥਿਤੀ ਵਿੱਚ ਡਾਕਟਰ ਸਿਰਫ ਇੱਕ ਕਾਲ ਦੂਰ ਹੈ। ਜੇਲ੍ਹ ਦੇ ਡਾਕਟਰਾਂ ਦੀ ਸਿਫਾਰਿਸ਼ ‘ਤੇ ਅਜਿਹੇ ਬਜ਼ੁਰਗ ਕੈਦੀਆਂ ਨੂੰ ਵਿਸ਼ੇਸ਼ ਖੁਰਾਕ ਵੀ ਦਿੱਤੀ ਜਾ ਸਕਦੀ ਹੈ ਜਿਵੇਂ ਵਧੇਰੇ ਦੁੱਧ ਜਾਂ ਹੋਰ ਭੋਜਨ ਦੇ ਰੂਪ ਵਿੱਚ ਆਦਿ।”
‘3,206 ਅਧਿਆਪਕਾਂ ਦੀ ਭਰਤੀ ਨਾਲ ਜੁੜਿਆ ਇਹ ਘੋਟਾਲਾ’
ਇੰਡੀਅਨ ਨੈਸ਼ਨਲ ਲੋਕ ਦਲ (ਇਨੈਲੋ) ਦੇ ਮੁਖੀ ਓਮ ਪ੍ਰਕਾਸ਼ ਚੌਟਾਲਾ ਨੂੰ ਜੂਨੀਅਰ ਬੇਸਿਕ ਟੀਚਰਸ (ਜੇਬੀਟੀ) ਭਰਤੀ ਘੁਟਾਲੇ ਦੇ ਮਾਮਲੇ ਵਿੱਚ ਆਪਣੀ ਜੇਲ੍ਹ ਦੀ ਮਿਆਦ ਪੂਰੀ ਕਰਨ ਤੋਂ ਬਾਅਦ ਪਿਛਲੇ ਸਾਲ 7 ਫਰਵਰੀ ਨੂੰ ਜੇਲ੍ਹ ਤੋਂ ਰਿਹਾਅ ਕੀਤਾ ਗਿਆ ਸੀ। ਇਹ ਘੁਟਾਲਾ 1999-2000 ਵਿੱਚ 3,206 ਅਧਿਆਪਕਾਂ ਦੀ ਭਰਤੀ ਨਾਲ ਸਬੰਧਤ ਹੈ, ਜਦੋਂ ਚੌਟਾਲਾ ਹਰਿਆਣਾ ਦੇ ਮੁੱਖ ਮੰਤਰੀ ਸਨ।
