ਲੁਧਿਆਣਾ ਦੇ ਪੱਖੋਵਾਲ ਰੋਡ ‘ਤੇ ਸਥਿਤ ਪਿੰਡ ਲਲਤੋਂ ਕਲਾਂ ਦੇ ਨੇੜੇ ਬਾਥ ਕੈਸਟਲ ਪੈਲੇਸ ਬੀਤੀ ਦੇਰ ਰਾਤ ਵਿਆਹ ਸਮਾਗਮ ਦੌਰਾਨ ਗੈਂਗਲੈਂਡ ਬਣ ਗਿਆ। ਵੱਡੇ ਵੱਡੇ ਪੁਲੀਸ ਅਫ਼ਸਰ, ਅਧਿਕਾਰੀ, ਸਿਆਸੀ ਆਗੂ, ਸਮਾਜਿਕ ਆਗੂਆਂ ਦੇ ਸਾਹਮਣੇ ਹੀ ਸ਼ਹਿਰ ਦੇ ਦੋ ਪੁਰਾਣੇ ਗੈਂਗਸਟਰ ਗੁੱਟਾਂ ਨੇ ਇੱਕ ਦੂਜ਼ੇ ਦੇ ਉਪਰ 70 ਤੋਂ 80 ਰਾਉਂਡ ਫਾਈਰਿੰਗ ਕੀਤੀ। ਇਨ੍ਹਾਂ ਹੀ ਨਹੀਂ ਮੇਲਾ ਠੇਕੇਦਾਰ ਵਰਿੰਦਰ ਕਪੂਰ ਦੀ ਭਤੀਜ਼ੇ ਦਾ ਵਿਆਹ ਕੁੱਝ ਮਿੰਟਾਂ ਵਿੱਚ ਹੀ ਸੋਗ ਸਮਾਗਮ ਵਿੱਚ ਬਦਲ ਗਿਆ। ਨੀਰੂ ਛਾਬੜਾ ਔਰਤ ਸਣੇ ਦੋ ਲੋਕਾਂ ਦੀ ਮੌਕੇ ’ਤੇ ਹੀ ਮੋਤ ਹੋ ਗਈ। ਇੱਕ ਹੋਰ ਵਿਅਕਤੀ ਦੀ ਮੌਤ ਦੀ ਖ਼ਬਰ ਹੈ, ਪਰ ਪ੍ਰਸ਼ਾਸਨ ਹਾਲੇ ਇਸ ਨੂੰ ਸਪੱਸ਼ਟ ਨਹੀਂ ਕਰ ਰਿਹਾ। ਇਸ ਮਾਮਲੇ ਵਿੱਚ ਐਨਜੀਓ ਚਲਾਉਣ ਵਾਲੇ ਜੇਕੇ ਡਾਵਰ ਸਣੇ ਚਾਰ ਲੋਕਾਂ ਫੱਟੜ ਹਨ। ਲੋਕ ਦੇਰ ਰਾਤ ਗੋਲੀਆਂ ਚਲਦੇ ਹੀ ਵਿਆਹ ਛੱਡ ਆਪਣੇ ਘਰਾਂ ਨੂੰ ਭੱਜੇ। ਦੇਖਣ ਵਾਲਿਆਂ ਮੁਤਾਬਕ ਬਹੁਤ ਸਾਰੇ ਲੋਕਾਂ ਨੇ ਕੁਰਸੀਆਂ ਤੇ ਹੋਰਨਾਂ ਥਾਵਾਂ ’ਤੇ ਲੁੱਕ ਕੇ ਆਪਣੀ ਜਾਨ ਬਚਾਈ। ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਸ ਸਮਾਗਮ ਵਿੱਚ ਕਈ ਸਿਆਸੀ ਤੇ ਸਮਾਜਿਕ ਆਗੂ ਮੌਜੂਦ ਸਨ। ਦੇਰ ਰਾਤ ਗੋਲੀਬਾਰੀ ਦੀ ਸੂਚਨਾ ਮਿਲਦੇ ਹੀ ਪੁਲੀਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਮੁਤਾਬਕ ਸ਼ਨਿੱਚਰਵਾਰ ਨੂੰ ਸ਼ਹਿਰ ਵਿੱਚ ਮੇਲੇ ਲਗਾਉਣ ਵਾਲੇ ਠੇਕੇਦਾਰ ਵਰਿੰਦਰ ਕਪੂਰ ਦੇ ਭਤੀਜ਼ੇ ਦਾ ਵਿਆਹ ਬਾਥ ਕੈਸਟਲ ਵਿੱਚ ਸੀ।
ਵਿਆਹ ਵਿੱਚ ਉਸਨੇ ਦੋ ਗੈਂਗਸਟਰ ਗਰੁੱਪਾਂ ਨੂੰ ਬੁਲਾਇਆ ਹੋਇਆ ਸੀ। ਦੋਵਾਂ ਗਰੁੱਪਾਂ ਵਿੱਚ ਲੰਬੇ ਲੰਬੇ ਸਮੇਂ ਤੋਂ ਦੁਸ਼ਮਣੀ ਸੀ। ਉਹ ਪੈਲੇਸ ਵਿੱਚ ਇਕੱਠੇ ਹੋਏ ਅਤੇ ਇੱਕ ਦੂਜੇ ਦਾ ਸਾਹਮਣਾ ਕਰਨ ਲੱਗੇ। ਸ਼ਰਾਬ ਦੇ ਨਸ਼ੇ ਵਿੱਚ ਦੋਵਾਂ ਧੜਿਆਂ ਵਿੱਚ ਬਹਿਸ ਸ਼ੁਰੂ ਹੋ ਗਈ। ਇਸ ਦੌਰਾਨ ਦੋਵਾਂ ਧੜਿਆਂ ਦੇ ਨੌਜਵਾਨ ਆਪਸ ਵਿੱਚ ਭਿੜ ਗਏ। ਅਚਾਨਕ ਹੀ ਉਨ੍ਹਾਂ ਨੇ ਇੱਕ ਦੂਜੇ ’ਤੇ ਗੋਲੀਆਂ ਚਲਾ ਦਿੱਤੀਆਂ। ਗੋਲੀਬਾਰੀ ਨਾਲ ਪੂਰੇ ਪੈਲੇਸ ਵਿੱਚ ਦਹਿਸ਼ਤ ਫੈਲ ਗਈ। ਲੋਕਾਂ ਨੇ ਭੱਜ ਕੇ ਆਪਣੀ ਜਾਨ ਬਚਾਈ। ਵਿਆਹ ਵਿੱਚ ਸ਼ਾਮਲ ਹੋਣ ਵਾਲੀ ਇੱਕ ਨੀਰੂ ਛਾਬੜਾ ਨਾਮ ਦੀ ਔਰਤ ਨੂੰ ਗੋਲੀ ਲੱਗ ਗਈ, ਜਦੋਂ ਕਿ ਨੇੜੇ ਹੀ ਖਾਣਾ ਖਾ ਰਹੇ ਵਾਸੂ ਨਾਂ ਦੇ ਵਿਅਕਤੀ ਨੂੰ ਵੀ ਗੋਲੀ ਲੱਗ ਗਈ। ਦੋਵਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਉਧਰ, ਮਾਮਲੇ ਦੀ ਸੁਲਝਾਉਣ ਆਏ ਸਮਾਜਿਕ ਕਾਰਕੁਨ ਜੇ.ਕੇ. ਡਾਵਰ ਨੂੰ ਵੀ ਗੋਲੀ ਲੱਗੀ। ਜੋਕਿ ਡੀਐਮਸੀ ਹਸਪਤਾਲ ਵਿੱਚ ਜ਼ੇਰੇਇਲਾਜ਼ ਹਨ। ਕੁਝ ਮਿੰਟਾਂ ਵਿੱਚ ਜਿਸ ਥਾਂ ਜਸ਼ਨ ਹੋ ਰਹੇ ਸਨ, ਉਥੇ ਸੋਗ ਦੇ ਮਾਹੌਲ ਬਣ ਗਿਆ। ਇਸ ਦੌਰਾਨ ਗੈਂਗਸਟਰ ਵੀ ਮੌਕੇ ਦਾ ਫਾਇਦਾ ਉਠਾਉਂਦੇ ਹੋਏ ਭੱਜ ਗਏ। ਗੋਲੀਬਾਰੀ ਕਰਨ ਵਾਲੇ ਸਾਰੇ ਗੈਂਗਸਟਰ ਪੁਲੀਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਉੱਥੋਂ ਚਲੇ ਗਏ ਸਨ। ਪੁਲੀਸ ਮੌਕੇ ’ਤੇ ਬਾਥ ਕੈਸਟਲ ਵਿੱਚ ਪਹੁੰਚ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕਰ ਰਹੀ ਹੈ। ਏਸੀਪੀ ਹਰਜਿੰਦਰ ਸਿੰਘ ਨੇ ਦੱਸਿਆ ਕਿ ਦੋ ਲੋਕਾਂ ਦੀ ਮੌਤ ਹੋ ਗਈ ਹੈ, ਜਾਂਚ ਜਾਰੀ ਹੈ। ਮੁਲਜ਼ਮਾਂ ਦੀ ਪਛਾਣ ਕਰਕੇ ਜਲਦੀ ਹੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।
