ਕੋਵਿਡ -19 ਦੇ ਕਾਰਨ ਲੌਕਡਾਊਨ ਦੌਰਾਨ, ਜਦੋਂ ਜ਼ਿਆਦਾਤਰ ਲੋਕ ਆਪਣੇ ਘਰਾਂ ਵਿੱਚ ਬੰਦ ਸਨ ਅਤੇ ਆਪਣੇ ਸ਼ੌਕ ਅਜ਼ਮਾ ਰਹੇ ਸਨ, ਅਸ਼ੋਕ ਥਾਮਰਕਸ਼ਣ ਇੱਕ ਬਹੁਤ ਹੀ ਖਾਸ ਕੰਮ ਵਿੱਚ ਰੁੱਝੇ ਹੋਏ ਸਨ। ਅਸ਼ੋਕ, ਮੂਲ ਰੂਪ ਵਿੱਚ ਕੇਰਲਾ ਦਾ ਰਹਿਣ ਵਾਲਾ ਹੈ ਅਤੇ ਹੁਣ ਬ੍ਰਿਟੇਨ ਵਿੱਚ ਰਹਿ ਰਿਹਾ ਹੈ। ਉਹ ਇੱਕ ਆਟੋਮੋਬਾਈਲ ਇੰਜੀਨੀਅਰ ਹੈ ਅਤੇ ਉਸਨੇ ਲੌਕਡਾਊਨ ਦੌਰਾਨ ਖੁਦ ਇੱਕ ਹਵਾਈ ਜਹਾਜ਼ ਬਣਾਇਆ ਹੈ।
ਯੂਕੇ ਵਿੱਚ ਲਿਆ ਪਾਇਲਟ ਲਾਇਸੈਂਸ
ਦਿ ਨਿਊ ਇੰਡੀਅਨ ਐਕਸਪ੍ਰੈਸ ਨਾਲ ਗੱਲ ਕਰਦੇ ਹੋਏ ਅਸ਼ੋਕ ਨੇ ਦੱਸਿਆ ਕਿ ਜਦੋਂ ਉਹ ਯੂਕੇ ਗਿਆ ਸੀ ਤਾਂ ਉਸਨੂੰ ਇੱਕ ਏਅਰਕ੍ਰਾਫਟ ਖਰੀਦਣ ਦਾ ਸੌਂਕ ਪੈਦਾ ਹੋ ਗਿਆ ਸੀ। ਉਸ ਨੇ ਪਾਇਲਟ ਦਾ ਲਾਇਸੈਂਸ ਵੀ ਲਿਆ ਅਤੇ ਹਵਾਈ ਜਹਾਜ਼ ਦੀ ਭਾਲ ਸ਼ੁਰੂ ਕਰ ਦਿੱਤੀ, ਪਰ ਉਦੋਂ ਹੀ ਉਸ ਨੂੰ ਪਤਾ ਲੱਗਾ ਕਿ ਇਸ ‘ਤੇ ਲਗਭਗ 5 ਤੋਂ 6 ਕਰੋੜ ਰੁਪਏ ਖਰਚਣੇ ਹੋਣਗੇ। ਇਸ ਤੋਂ ਬਾਅਦ ਉਸ ਨੇ ਖੁਦ ਜਹਾਜ਼ ਬਣਾਉਣ ਦਾ ਫੈਸਲਾ ਕੀਤਾ।
ਅਸ਼ੋਕ ਦਾ ਕਹਿਣਾ ਹੈ ਕਿ ਬ੍ਰਿਟੇਨ ਅਤੇ ਹੋਰ ਦੇਸ਼ਾਂ ਦੇ ਕਈ ਲੋਕ ਛੋਟੇ ਹਵਾਈ ਜਹਾਜ਼ ਬਣਾ ਰਹੇ ਹਨ। ਇੱਥੇ ਇਸ ਦੇ ਹਿੱਸੇ ਆਸਾਨੀ ਨਾਲ ਮਿਲ ਜਾਂਦੇ ਹਨ। ਉਸਨੇ ਦੱਖਣੀ ਅਫਰੀਕਾ ਤੋਂ ਆਪਣੇ ਹਵਾਈ ਜਹਾਜ਼ ਦੇ ਪੁਰਜ਼ੇ, ਆਸਟ੍ਰੀਆ ਤੋਂ ਇੰਜਣ ਅਤੇ ਅਮਰੀਕਾ ਤੋਂ ਐਵੀਓਨਿਕ ਉਪਕਰਣ ਖਰੀਦੇ। ਉਸਨੇ ਆਪਣੇ ਘਰ ਦੇ ਨੇੜੇ ਇੱਕ ਵਰਕਸ਼ਾਪ ਬਣਾਈ ਅਤੇ ਅਪ੍ਰੈਲ 2020 ਵਿੱਚ ਕੰਮ ਸ਼ੁਰੂ ਕੀਤਾ।
ਲੌਕਡਾਊਨ ਵਿੱਚ ਬਣਾਇਆ ਜਹਾਜ਼
ਅਸ਼ੋਕ ਦੇ ਇਸ ਕੰਮ ਦੀ ਨਿਗਰਾਨੀ ਯੂਕੇ ਏਵੀਏਸ਼ਨ ਅਥਾਰਟੀ ਦੁਆਰਾ ਕੀਤੀ ਗਈ ਸੀ। ਅਸ਼ੋਕ ਨੇ ਦੱਸਿਆ ਕਿ ਬ੍ਰਿਟੇਨ ‘ਚ ਲਾਕਡਾਊਨ ਕਾਰਨ ਕੰਪਨੀ ਨੇ ਕੰਮਕਾਜ ਬੰਦ ਕਰ ਦਿੱਤਾ ਸੀ। ਜਿਸ ਨੇ ਉਸਨੂੰ ਆਪਣੇ ਪ੍ਰੋਜੈਕਟ ‘ਤੇ ਧਿਆਨ ਦੇਣ ਵਿੱਚ ਮਦਦ ਕੀਤੀ। ਸ਼ੁਰੂ ਵਿਚ, ਉਨ੍ਹਾਂ ਨੇ ਦੋ ਸੀਟਾਂ ਵਾਲਾ ਜਹਾਜ਼ ਬਣਾਉਣ ਦਾ ਫੈਸਲਾ ਕੀਤਾ। ਹਾਲਾਂਕਿ, ਆਪਣੀ ਪਤਨੀ ਅਤੇ ਦੋ ਬੱਚਿਆਂ ਨਾਲ ਪਰਿਵਾਰਕ ਯਾਤਰਾ ਲਈ, ਅਸ਼ੋਕ ਨੂੰ ਚਾਰ ਸੀਟਾਂ ਵਾਲੇ ਜਹਾਜ਼ ਦੀ ਜ਼ਰੂਰਤ ਸੀ। ਇਸੇ ਲਈ ਉਸ ਨੇ 4 ਸੀਟਾਂ ਵਾਲਾ ਜਹਾਜ਼ ਬਣਾਇਆ ਹੈ।
ਅਸ਼ੋਕ ਦੇ ਅਨੁਸਾਰ, ਉਨ੍ਹਾਂ ਦੇ ਕੰਮ ਦੀ ਨਿਗਰਾਨੀ ਯੂਕੇ ਸਿਵਲ ਏਵੀਏਸ਼ਨ ਅਥਾਰਟੀ ਦੁਆਰਾ ਕੀਤੀ ਗਈ ਸੀ ਅਤੇ ਨਿਰਮਾਣ ਦੇ ਹਰ ਪੜਾਅ ਦਾ ਨਿਰੀਖਣ ਕੀਤਾ ਗਿਆ ਸੀ। ਅਸ਼ੋਕ ਨੇ ਲਗਾਤਾਰ ਤਿੰਨ ਮਹੀਨਿਆਂ ਤੱਕ ਜਹਾਜ਼ ‘ਤੇ ਫਲਾਈਟ ਟੈਸਟ ਕਰਵਾਏ ਅਤੇ ਆਖਰਕਾਰ ਇਹ ਫਰਵਰੀ ‘ਚ ਉਡਾਣ ਲਈ ਤਿਆਰ ਹੋ ਗਿਆ।
ਜਹਾਜ ਬਣਾਉਣ ਲਈ ਖਰਚ ਹੋਏ 1.8 ਕਰੋੜ
ਅਸ਼ੋਕ ਨੇ ਇਸ ਜਹਾਜ਼ ਨੂੰ ਬਣਾਉਣ ਲਈ ਲਗਭਗ 1.8 ਕਰੋੜ ਰੁਪਏ ਅਤੇ 1,500 ਘੰਟੇ ਖਰਚ ਕੀਤੇ। ਇਸ ਜਹਾਜ਼ ਦਾ ਭਾਰ 520 ਕਿਲੋਗ੍ਰਾਮ ਹੈ ਅਤੇ ਜਹਾਜ ਦੀ ਸਮਰੱਥਾ 950 ਕਿਲੋਗ੍ਰਾਮ ਹੈ। ਇਹ 250 ਕਿਲੋਮੀਟਰ ਦੀ ਦੂਰੀ ਇੱਕ ਘੰਟੇ ਵਿੱਚ ਤੈਅ ਕਰ ਸਕਦਾ ਹੈ। ਅਸ਼ੋਕ ਨੇ ਆਪਣੀ ਧੀ ਦੀਆ ਦੇ ਨਾਮ ‘ਤੇ ਜਹਾਜ਼ ਦਾ ਨਾਮ ਜੀ-ਦੀਆ (ਜੀ ਦੇਸ਼ ਦਾ ਕੋਡ ਹੈ) ਰੱਖਿਆ।
ਉਡਾਣ ਭਰਨ ਦੀ ਇਜਾਜ਼ਤ ਮਿਲਣ ਤੋਂ ਬਾਅਦ ਅਸ਼ੋਕ ਅਤੇ ਉਸਦੇ ਦੋ ਦੋਸਤਾਂ ਨੇ ਫਰਾਂਸ, ਜਰਮਨੀ, ਆਸਟ੍ਰੀਆ ਅਤੇ ਚੈੱਕ ਗਣਰਾਜ ਦਾ ਦੌਰਾ ਕੀਤਾ। ਹੁਣ ਤੱਕ ਜਹਾਜ਼ ਨੇ 86 ਘੰਟੇ ਦੀ ਉਡਾਣ ਰਿਕਾਰਡ ਕੀਤੀ ਹੈ। ਅਸ਼ੋਕ ਦਾ ਕਹਿਣਾ ਹੈ ਕਿ ਉਹ ਅਗਲੇ ਮਹੀਨੇ ਤੱਕ ਯੂਕੇ ਪਰਤਣ ਤੋਂ ਬਾਅਦ ਹੋਰ ਯਾਤਰਾਵਾਂ ਕਰੇਗਾ।
