ਚੰਡੀਗੜ੍ਹ: ਪੰਜਾਬ ਸਰਕਾਰ ਆਏ ਦਿਨ ਆਪਣੇ ਵੱਲੋਂ ਕੀਤੇ ਗਏ ਕੰਮਾਂ ਦੀ ਸ਼ਲਾਘਾ ਕਰਦੀ ਅਤੇ ਉਨ੍ਹਾਂ ਕੰਮਾਂ ਦਾ ਦਮ ਭਰਦੀ ਨਜ਼ਰ ਆਉਂਦੀ ਹੈ। ਇਸ ਦੇ ਨਾਲ ਹੀ ਸੂੂਬਾ ਸਰਕਾਰ ਨੇ ਚੋਣਾਂ ਦੌਰਾਨ ਕਈ ਵਾਅਦੇ ਵੀ ਕੀਤੇ ਸੀ ਜਿਨ੍ਹਾਂ ਚੋਂ ਇਹ ਵੀ ਕਿਹਾ ਗਿਆ ਸੀ ਕਿ ਜਨਤਾ ਨੂੰ ਵਧੀਆ ਸਿਹਤ ਸਹੂਲਤਾਂ ਦੇ ਨਾਲ ਖੇਡਾਂ ਪ੍ਰਤੀ ਜਾਗਰੂਕ ਕਰ ਉਨ੍ਹਾਂ ਨੂੰ ਇਸ ਪ੍ਰਤੀ ਉਤਸ਼ਾਹਿਤ ਕੀਤਾ ਜਾਵੇਗਾ। ਇਸੇ ਦੀ ਤਹਿਤ ਸਰਕਾਰ ਨੇ ‘ਖੇਡਾਂ ਵਤਨ ਪੰਜਾਬ ਦੀਆਂ’ ਕਰਵਾਈ ਅਤੇ ਖਿਡਾਰੀਆਂ ਨੂੰ ਹਲਾਸ਼ੇਰੀ ਦਿੱਤੀ।
ਇਸ ਸਭ ਦੇ ਦੂਜੇ ਪਾਸੇ ਸਾਹਮਣੇ ਆਈ ਇੱਕ ਤਾਜ਼ਾ ਘਟਨਾ ਨੇ ਇਨ੍ਹਾਂ ਦਾਅਵਿਆਂ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ। ਦਰਅਸਲ ਖ਼ਬਰ ਹੈ ਕਿ ਟੋਕਿਆ ਓਲੰਪਿਕ ਵਿੱਚ ਮਹਿਲਾ ਹਾਕੀ ਵਿੱਚ ਸਭ ਤੋਂ ਜ਼ਿਆਦਾ ਗੋਲ ਕਰਨ ਵਾਲੀ ਖਿਡਾਰਨ ਗੁਰਜੀਤ ਕੌਰ (GURJEET KAUR) ਦੀ ਮਾਂ ਨੂੰ ਹਸਪਤਾਲ ‘ਚ ਇਲਾਜ ਦੌਰਾਨ ਬੈੱਡ ਨਹੀਂ ਮਿਲਿਆ।
ਇਨ੍ਹਾਂ ਹੀ ਨਹੀਂ ਇਸ ਖਿਡਾਰਨ ਦੀ ਮਾਤਾ ਨੂੰ ਹਸਪਤਾਲ ‘ਚ ਚਾਰ ਦਿਨ ਬੈੱਡ ਨਹੀਂ ਮਿਲਿਆ। ਜਿਸ ਮੰਗਰੋਂ ਉਨ੍ਹਾਂ ਨੇ ਚੰਡੀਗੜ੍ਹ PGI ‘ਚ ਦਮ ਤੋੜ ਦਿੱਤਾ। ਦੱਸ ਦਈਏ ਕਿ ਗੁਰਜੀਤ ਕੌਰ ਦੀ ਮਾਂ ਕਿਡਨੀ ਦੀ ਬਿਮਾਰੀ ਤੋਂ ਪੀੜਤ ਸੀ। ਉਨ੍ਹਾਂ ਦਾ ਇਲਾਜ ਬਠਿੰਡਾ AIIMS ਵਿੱਚ ਪਹਿਲਾਂ ਚੱਲ ਰਿਹਾ ਸੀ ਪਰ ਡਾਕਟਰਾਂ ਦੀ ਸਲਾਹ ‘ਤੇ ਉਨ੍ਹਾਂ ਨੂੰ PGI ਚੰਡੀਗੜ੍ਹ ਰੈਫਰ ਕਰ ਦਿੱਤਾ ਗਿਆ। ਪਰਿਵਾਰ 22 ਅਕਤੂਬਰ ਨੂੰ ਉਨ੍ਹਾਂ ਨੂੰ ਚੰਡੀਗੜ੍ਹ ਲੈਕੇ ਆਇਆ ਸੀ। ਪਰ ਚਾਰ ਦਿਨ ਤੱਕ ਬੈੱਡ ਨਹੀਂ ਮਿਲਿਆ।
ਡਾਕਟਰਾਂ ਨੇ ਗੁਰਜੀਤ ਦੀ ਮਾਂ ਦਾ ਡਾਇਲਸਿਸ ਕਰਕੇ ਉਨ੍ਹਾਂ ਨੂੰ ਸਟਰੈਚਰ ‘ਤੇ ਹੀ ਰੱਖ ਦਿੱਤਾ। ਇਨਫੈਕਸ਼ਨ ਕਰਕੇ ਉਨ੍ਹਾਂ ਦੀ ਮੌਤ ਹੋ ਗਈ ਹੈ। ਗੁਰਜੀਤ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਮਾਂ ਨੂੰ ਬੈੱਡ ਦਿਵਾਉਣ ਦੇ ਲਈ ਉਨ੍ਹਾਂ ਨੇ ਕਈ ਮੰਤਰੀਆਂ ਨੂੰ ਫੋਨ ਕੀਤਾ ਪਰ ਕਿਸੇ ਨਹੀਂ ਚੁੱਕਿਆ। ਇਸ ਨਾਲ ਇਹ ਤਾਂ ਸਾਫ਼ ਹੈ ਕਿ ਜੇਕਰ ਪੰਜਾਬ ਦੀ ਮੰਨੀ-ਪਰਮੰਨੀ ਖਿਡਾਰਨ ਨੂੰ ਆਪਣੀ ਮਾਂ ਦੇ ਇਲਾਜ ਲਈ ਇੰਨੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਤਾਂ ਆਮ ਜਨਤਾ ਦਾ ਕੀ ਹਾਲ ਹੋਵੇਗਾ ਇਸ ਦਾ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ।
ਬੰਗਲੁਰੂ ਕੈਂਪ ਵਿੱਚ ਸੀ ਗੁਰਜੀਤ ਕੌਰ
ਗੁਰਜੀਤ ਕੌਰ ਬੰਗਲੁਰੂ ਵਿੱਚ ਹਾਕੀ ਕੈਂਪ ਵਿੱਚ ਸੀ ਜਿਸ ਵੇਲੇ ਉਨ੍ਹਾਂ ਨੂੰ ਮਾਂ ਦੀ ਮੌਤ ਦੀ ਖ਼ਬਰ ਮਿਲੀ ਅਤੇ ਹੁਣ ਉਹ ਵਾਪਸ ਘਰ ਪਰਤ ਰਹੀ ਹੈ। ਅਜਨਾਲੇ ਦੇ ਨੇੜਲੇ ਪਿੰਡ ਮਿਆਦੀ ਕਲਾਂ ਦੀ ਰਹਿਣ ਵਾਲੀ ਗੁਰਜੀਤ ਕੌਰ ਦਾ ਜੀਵਨ ਸੰਘਰਸ਼ ਨਾਲ ਭਰਿਆ ਹੈ। ਹਾਕੀ ਦੇ ਲਈ ਉਨ੍ਹਾਂ ਨੇ 11 ਸਾਲ ਦੀ ਉਮਰ ਵਿੱਚ ਘਰ ਛੱਡ ਦਿੱਤਾ ਸੀ। ਤਰਨਤਾਰਨ ਦੇ ਪਿੰਡ ਕੈਰੋਂ ਦੀ ਸਰਕਾਰੀ ਸਪੋਰਟਸ ਅਕੈਡਮੀ ਵਿੱਚ ਗੁਰਜੀਤ ਕੌਰ ਨੇ ਦਾਖਲਾ ਲੈ ਲਿਆ।
ਗੁਰਜੀਤ ਦੀ ਵੱਡੀ ਭੈਣ ਪ੍ਰਦੀਪ ਕੌਰ ਵੀ ਹਾਕੀ ਦੀ ਖਿਡਾਰਨ ਅਤੇ ਕੋਚ ਹੈ ਜਦਕਿ ਭਰਾ ਕਬੱਡੀ ਖਿਡਾਰੀ ਹੈ। ਗੁਰਜੀਤ ਕੌਰ 2012 ਵਿੱਚ 17 ਸਾਲ ਦੀ ਉਮਰ ਵਿੱਚ ਭਾਰਤੀ ਮਹਿਲਾ ਜੂਨੀਅਰ ਹਾਕੀ ਲਈ ਚੁਣੀ ਗਈ ਸੀ । 2014 ਵਿੱਚ ਉਸ ਦੀ ਸੀਨੀਅਰ ਮਹਿਲਾ ਹਾਕੀ ਟੀਮ ਵਿੱਚ ਚੋਣ ਹੋਈ । 2017 ਤੋਂ ਗੁਰਜੀਤ ਇਕੱਲੀ ਅਜਿਹੀ ਖਿਡਾਰੀ ਹੈ ਜੋ ਭਾਰਤੀ ਹਾਕੀ ਟੀਮ ਨਾਲ ਜੁੜੀ ਹੋਈ ਹੈ । ਇਸ ਦੌਰਾਨ ਕਈ ਹਾਕੀ ਖਿਡਾਰਨਾ ਆਇਆ ਪਰ ਉਹ ਹੁਣ ਵੀ ਆਪਣੀ ਥਾਂ ‘ਤੇ ਬਣੀ ਹੋਈ ਹੈ। 2021 ਦੀਆਂ ਓਲੰਪਿਕ ਖੇਡਾਂ ਵਿੱਚ ਭਾਰਤ ਵੱਲੋਂ ਉਨ੍ਹਾਂ ਨੇ ਸਭ ਤੋਂ ਵਧ ਗੋਲ ਕੀਤੇ ਸੀ।
