ਹਿਮਾਚਲ ਪ੍ਰਦੇਸ਼ ਦੇ ਕੁੱਲੂ ਅਤੇ ਕਾਂਗੜਾ ਵਿੱਚ ਬੱਦਲ ਫਟਣ ਦੀਆਂ ਹਾਲ ਹੀ ਵਿੱਚ ਹੋਈਆਂ ਘਟਨਾਵਾਂ ਤੋਂ ਬਾਅਦ, ਸੈਲਾਨੀਆਂ ਵਿੱਚ ਡਰ ਦਾ ਮਾਹੌਲ ਹੈ, ਜਿਸ ਕਾਰਨ ਉਨ੍ਹਾਂ ਨੇ ਪਹਾੜਾਂ ‘ਤੇ ਜਾਣਾ ਘੱਟ ਕਰ ਦਿੱਤਾ ਹੈ। ਲਗਭਗ 10% ਸੈਲਾਨੀਆਂ ਨੇ ਹੋਟਲਾਂ ਵਿੱਚ ਆਪਣੀਆਂ ਐਡਵਾਂਸ ਬੁਕਿੰਗਾਂ ਰੱਦ ਕਰ ਦਿੱਤੀਆਂ ਹਨ।
ਹਾਲਾਂਕਿ, ਸਰਕਾਰ ਲਗਾਤਾਰ ਭਰੋਸਾ ਦੇ ਰਹੀ ਹੈ ਕਿ ਹਿਮਾਚਲ ਵਿੱਚ ਕੋਈ ਖ਼ਤਰਾ ਨਹੀਂ ਹੈ, ਅਤੇ ਸੈਲਾਨੀਆਂ ਨੂੰ ਸਿਰਫ਼ ਥੋੜ੍ਹੀ ਜਿਹੀ ਸਾਵਧਾਨੀ ਵਰਤਣ ਦੀ ਲੋੜ ਹੈ। ਹਰਿਆਣਾ, ਪੰਜਾਬ, ਚੰਡੀਗੜ੍ਹ, ਦਿੱਲੀ ਅਤੇ ਹੋਰ ਰਾਜਾਂ ਤੋਂ ਵੱਡੀ ਗਿਣਤੀ ਵਿੱਚ ਸੈਲਾਨੀ ਪਹਾੜਾਂ ‘ਤੇ ਪਹੁੰਚਦੇ ਹਨ। ਇਸ ਦੇ ਮੱਦੇਨਜ਼ਰ, ਹਿਮਾਚਲ ਪ੍ਰਦੇਸ਼ ਟੂਰਿਜ਼ਮ ਡਿਵੈਲਪਮੈਂਟ ਕਾਰਪੋਰੇਸ਼ਨ (HPTDC) ਨੇ ਸੈਲਾਨੀਆਂ ਨੂੰ ਆਕਰਸ਼ਿਤ ਕਰਨ ਲਈ ਇੱਕ ਵਿਸ਼ੇਸ਼ ਪੈਕੇਜ ਦਾ ਐਲਾਨ ਕੀਤਾ ਹੈ।
ਇਸ ਤਹਿਤ 15 ਜੁਲਾਈ ਤੋਂ 12 ਸਤੰਬਰ ਤੱਕ ਨਿਗਮ ਦੇ ਹੋਟਲਾਂ ਵਿੱਚ 20 ਤੋਂ 40 ਪ੍ਰਤੀਸ਼ਤ ਦੀ ਛੋਟ ਦਿੱਤੀ ਜਾਵੇਗੀ। ਆਮ ਤੌਰ ‘ਤੇ, ਗਰਮੀਆਂ ਦੇ ਮੌਸਮ ਦੌਰਾਨ ਹੋਟਲ ਪੂਰੀ ਤਰ੍ਹਾਂ ਭਰੇ ਰਹਿੰਦੇ ਹਨ, ਪਰ ਬਰਸਾਤ ਦੇ ਮੌਸਮ ਦੌਰਾਨ ਸੈਲਾਨੀਆਂ ਦੀ ਗਿਣਤੀ ਘੱਟ ਜਾਂਦੀ ਹੈ। ਇਸ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਨਿਗਮ ਨੇ ਇਹ ਪੈਕੇਜ ਤਿਆਰ ਕੀਤਾ ਹੈ, ਤਾਂ ਜੋ ਵੱਧ ਤੋਂ ਵੱਧ ਸੈਲਾਨੀ ਇੱਥੇ ਆ ਕੇ ਠਹਿਰ ਸਕਣ।
ਇਸ ਵਿੱਚ ਹੀ ਕੁਝ ਅਜਿਹੀਆਂ ਥਾਵਾਂ ਹੁੰਦੀਆਂ ਹਨ ਜਿੱਠੜੇ ਮਾਨਸੂਨ ਵਿੱਚ ਭਾਰੀ ਮੀਂਹ ਪੈਣ ਤੋਂ ਬਾਅਦ ਵੀ ਹੜ ਦਾ ਖਤਰਾ ਘੱਟ ਹੁੰਦਾ ਹੈ ਤੇ ਇਹ ਥਾਵਾਂ ਘੁੰਮਣ ਲਈ ਸਭ ਤੋਂ ਸੁਰਖਿਅਤ ਮੰਨੀਆਂ ਗਈਆਂ ਹਨ।
ਸ਼ਿਮਲਾ,ਕੁਫ਼ਰੀ,ਨਾਰਕੰਡਾ, ਚੈਲ, ਕਸੌਲੀ, ਧਰਮਸ਼ਾਲਾ, ਮਨਾਲੀ, ਡਲਹੌਜ਼ੀ
ਪਿਛਲੇ ਹਫ਼ਤੇ ਤੱਕ, ਰਾਜ ਦੇ ਜ਼ਿਆਦਾਤਰ ਸੈਰ-ਸਪਾਟਾ ਸਥਾਨਾਂ ‘ਤੇ 80 ਤੋਂ 90 ਪ੍ਰਤੀਸ਼ਤ ਤੱਕ ਭੀੜ ਸੀ। ਇਸ ਵਾਰ ਇਹ 50 ਤੋਂ 70 ਪ੍ਰਤੀਸ਼ਤ ਘੱਟ ਗਿਆ ਹੈ। ਸ਼ੁੱਕਰਵਾਰ (27 ਜੂਨ) ਨੂੰ ਸ਼ਿਮਲਾ ਦੇ ਹੋਟਲਾਂ ਵਿੱਚ 40 ਤੋਂ 50 ਪ੍ਰਤੀਸ਼ਤ ਦੀ ਭੀੜ ਸੀ। ਸ਼ਨੀਵਾਰ (28 ਜੂਨ) ਨੂੰ ਇਹ 60 ਪ੍ਰਤੀਸ਼ਤ ਤੱਕ ਪਹੁੰਚ ਗਿਆ। ਸ਼ਨੀਵਾਰ ਨੂੰ ਮਨਾਲੀ ਵਿੱਚ ਵੀ 50 ਤੋਂ 60 ਪ੍ਰਤੀਸ਼ਤ ਭੀੜ ਸੀ।
