WPL ਦੇ ਉਦਘਾਟਨੀ ਸੀਜ਼ਨ ਲਈ ਨਿਲਾਮੀ (ਡਬਲਯੂ.ਪੀ.ਐੱਲ. ਨਿਲਾਮੀ) ਤੋਂ ਇਕ ਦਿਨ ਬਾਅਦ, ਹੁਣ ਸੀਜ਼ਨ ਦੀ ਸਮਾਂ-ਸਾਰਣੀ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਬੀਸੀਸੀਆਈ ਨੇ ਮੰਗਲਵਾਰ ਨੂੰ ਪੂਰੇ ਪ੍ਰੋਗਰਾਮ ਦਾ ਐਲਾਨ ਕੀਤਾ। ਸੀਜ਼ਨ ਦਾ ਪਹਿਲਾ ਮੈਚ 4 ਮਾਰਚ ਨੂੰ ਗੁਜਰਾਤ ਜਾਇੰਟਸ ਅਤੇ ਮੁੰਬਈ ਇੰਡੀਅਨਜ਼ ਵਿਚਾਲੇ ਖੇਡਿਆ ਜਾਵੇਗਾ। ਅਜਿਹੇ ‘ਚ ਪ੍ਰਸ਼ੰਸਕਾਂ ਨੂੰ ਧਮਾਕੇਦਾਰ ਮੈਚ ਦੇਖਣ ਦੀ ਉਮੀਦ ਹੈ। ਫਾਈਨਲ 26 ਮਾਰਚ ਨੂੰ ਮੁੰਬਈ ਦੇ ਬ੍ਰੇਬੋਰਨ ਸਟੇਡੀਅਮ ‘ਚ ਹੋਵੇਗਾ। ਉਮੀਦ ਮੁਤਾਬਕ ਇਹ ਟੂਰਨਾਮੈਂਟ ਮੁੰਬਈ ‘ਚ ਹੀ ਖੇਡਿਆ ਜਾਵੇਗਾ। ਇਹ ਮੈਚ ਬ੍ਰੇਬੋਰਨ ਅਤੇ ਡੀਵਾਈ ਪਾਟਿਲ ਸਟੇਡੀਅਮ ਵਿੱਚ ਹੋਣਗੇ ਅਤੇ ਦੋਵਾਂ ਸਟੇਡੀਅਮਾਂ ਵਿੱਚ 11-11 ਮੈਚਾਂ ਦੀ ਮੇਜ਼ਬਾਨੀ ਕੀਤੀ ਗਈ ਹੈ।
4 ਤੋਂ 26 ਮਾਰਚ ਤੱਕ ਚੱਲਣ ਵਾਲੇ ਇਸ ਟੂਰਨਾਮੈਂਟ ਵਿੱਚ 17 ਅਤੇ 19 ਮਾਰਚ ਨੂੰ ਕੋਈ ਮੈਚ ਨਹੀਂ ਹੋਵੇਗਾ। ਲੀਗ ਪੜਾਅ ਦਾ ਆਖਰੀ ਮੈਚ 21 ਮਾਰਚ ਨੂੰ ਯੂਪੀ ਵਾਰੀਅਰਜ਼ ਅਤੇ ਦਿੱਲੀ ਕੈਪੀਟਲਸ ਵਿਚਾਲੇ ਹੋਵੇਗਾ। ਜਦਕਿ ਐਲੀਮੀਨੇਟਰ ਮੈਚ 24 ਮਾਰਚ ਨੂੰ ਖੇਡਿਆ ਜਾਵੇਗਾ।
ਇਹ ਮੈਚ ਭਾਰਤੀ ਸਮੇਂ ਅਨੁਸਾਰ ਦੁਪਹਿਰ 3.30 ਅਤੇ 7.30 ਵਜੇ ਖੇਡੇ ਜਾਣਗੇ, ਜਿਸ ਵਿੱਚ ਚਾਰ ਡਬਲ ਹੈਡਰ ਹੋਣਗੇ। ਹਰ ਟੀਮ ਬਾਕੀ ਚਾਰ ਟੀਮਾਂ ਨਾਲ ਦੋ-ਦੋ ਵਾਰ ਖੇਡੇਗੀ। ਅੰਕ ਸੂਚੀ ਵਿਚ ਪਹਿਲੇ ਸਥਾਨ ‘ਤੇ ਰਹਿਣ ਵਾਲੀ ਟੀਮ ਸਿੱਧੇ ਫਾਈਨਲ ਵਿਚ ਜਾਵੇਗੀ, ਜਦਕਿ ਦੂਜੇ ਅਤੇ ਤੀਜੇ ਸਥਾਨ ‘ਤੇ ਰਹਿਣ ਵਾਲੀ ਟੀਮ ਐਲੀਮੀਨੇਟਰ ਖੇਡੇਗੀ ਅਤੇ ਜੇਤੂ ਟੀਮ ਦੂਜੀ ਟੀਮ ਵਜੋਂ ਫਾਈਨਲ ਵਿਚ ਪ੍ਰਵੇਸ਼ ਕਰੇਗੀ।
ਸੋਮਵਾਰ ਨੂੰ ਹੋਈ ਨਿਲਾਮੀ ਵਿੱਚ ਸਾਰੀਆਂ ਟੀਮਾਂ ਨੇ ਕੁੱਲ 59 ਕਰੋੜ 50 ਲੱਖ ਰੁਪਏ ਖਰਚ ਕੀਤੇ। ਇਸ ਨਿਲਾਮੀ ਵਿੱਚ ਕੁੱਲ 87 ਖਿਡਾਰੀਆਂ ਦੀ ਕਿਸਮਤ ਖੁੱਲ੍ਹੀ, ਜਿਨ੍ਹਾਂ ਨੂੰ ਨਿਲਾਮੀ ਵਿੱਚ ਬੈਠੀਆਂ ਟੀਮਾਂ ਨੇ ਜੋੜਿਆ। ਇਸ ਦੌਰਾਨ 87 ‘ਚੋਂ 30 ਵਿਦੇਸ਼ੀ ਖਿਡਾਰੀ ਸਨ, ਜੋ ਹੁਣ ਭਾਰਤ ‘ਚ ਮਾਰਚ ਮਹੀਨੇ ਹੋਣ ਵਾਲੀ ਇਸ ਲੀਗ ‘ਚ ਆਪਣੇ ਜੌਹਰ ਦਿਖਾਉਣਗੇ। ਨਿਲਾਮੀ ਵਿੱਚ ਵਿਕਣ ਵਾਲੀ ਸਭ ਤੋਂ ਮਹਿੰਗੀ ਖਿਡਾਰਨ ਭਾਰਤੀ ਉਪ ਕਪਤਾਨ ਸਮ੍ਰਿਤੀ ਮੰਧਾਨਾ ਸੀ, ਜੋ ਨਿਲਾਮੀ ਵਿੱਚ ਵਿਕਣ ਵਾਲੀ ਪਹਿਲੀ ਖਿਡਾਰਨ ਵੀ ਬਣੀ। ਉਨ੍ਹਾਂ ਨੂੰ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਨੇ 3 ਕਰੋੜ 40 ਲੱਖ ‘ਚ ਖਰੀਦਿਆ ਸੀ।
ਨੋਟ: ਪੰਜਾਬੀ ਦੀਆਂ ਬ੍ਰੇਕਿੰਗ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੇ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਤੁਸੀਂ Pro Punjab TV ਨੂੰ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਫੇਸਬੁੱਕ, ਟਵਿੱਟਰ ਤੇ ਇੰਸਟਾਗ੍ਰਾਮ ‘ਤੇ ਵੀ ਫੋਲੋ ਕਰ ਸਕਦੇ ਹੋ।
TV, FACEBOOK, YOUTUBE ਤੋਂ ਪਹਿਲਾਂ ਹਰ ਖ਼ਬਰ ਪੜ੍ਹਣ ਲਈ ਡਾਉਨਲੋਡ ਕਰੋ PRO PUNJAB TV APP
APP ਡਾਉਨਲੋਡ ਕਰਨ ਲਈ Link ‘ਤੇ Click ਕਰੋ:
Android: https://bit.ly/3VMis0h
